അനീതിക്കെതിരായ എല്ലാ പോരാട്ടങ്ങളിലും ഒപ്പമുണ്ടാകും… കേരളത്തിലെ അധ്യാപക സമരത്തിന് ഒപ്പമുണ്ടാകുമെന്ന്…
ഡൽഹി: അനീതിക്കെതിരായ എല്ലാ പോരാട്ടങ്ങളിലും ഒപ്പമുണ്ടാകുമെന്ന് സിജെപി സ്ഥാപകൻ അഭിജീത് ദീപ്കെ. സാഹിൽ വാകോഡെ കേസ്, ജാമിയ മില്ലിയ സമരം, കേരളത്തിലെ അധ്യാപക സമരം തുടങ്ങിയ വിഷയങ്ങളിൽ പ്രതികരിക്കുന്നില്ലെന്ന സമൂഹമാധ്യമ വിമർശനങ്ങൾക്ക് മറുപടിയായാണ് അദ്ദേഹം നിലപാട് വ്യക്തമാക്കിയത്. ജാമിയ മില്ലിയ സമരം, ഭീമാശങ്കർ വിഷയം, കേരളത്തിലെ അധ്യാപക സമരം എന്നിവയിലുൾപ്പെടെ നീതിക്കുവേണ്ടിയുള്ള പോരാട്ടങ്ങൾക്ക് പിന്തുണ നൽകുമെന്ന് അഭിജീത് ദീപ്കെ അറിയിച്ചു.
സിജെപി രൂപീകരിച്ചിട്ട് ഏതാനും മാസങ്ങൾ മാത്രമേ ആയിട്ടുള്ളൂവെന്നും പരിമിതമായ വിഭവങ്ങൾ ഉപയോഗിച്ചാണ് സംഘടന പ്രവർത്തിക്കുന്നതെന്നും അദ്ദേഹം പറഞ്ഞു. താനും സഹപ്രവർത്തകരും ജയിലിലായിരുന്നുവെന്നും നൂറുകണക്കിന് പ്രവർത്തകരെ പൊലീസ് റോഡിലൂടെ വലിച്ചിഴയ്ക്കുകയും കള്ളക്കേസുകളിൽ കുടുക്കുകയും ചെയ്തുവെന്നും അദ്ദേഹം ആരോപിച്ചു. ഭരണകൂടത്തിന്റെ വേട്ടയാടലുകൾക്കിടയിലും നീതിക്കുവേണ്ടിയുള്ള പോരാട്ടം തുടരുമെന്നും അഭിജീത് ദീപ്കെ വ്യക്തമാക്കി. ഗ്യാനേഷ് കുമാർ ജനാധിപത്യത്തിന്റെ അന്തസത്ത തകർത്തുവെന്നും സ്വതന്ത്രവും നിഷ്പക്ഷവുമായ തിരഞ്ഞെടുപ്പ് നടത്തുന്നതിനാവശ്യമായ വിശ്വാസ്യത അദ്ദേഹത്തിന് നഷ്ടപ്പെട്ടുവെന്നും സിജെപി പ്രസ്താവനയിൽ ആരോപിച്ചു.
രാജ്യത്ത് സ്വതന്ത്രവും നീതിപൂർവവുമായ തിരഞ്ഞെടുപ്പിനായി പോരാടുന്ന എല്ലാ സംഘടനകൾക്കും പിന്തുണ നൽകുമെന്നും സംഘടന അറിയിച്ചു. കക്ഷിരാഷ്ട്രീയത്തിന് അതീതമായി പ്രവർത്തിക്കാനാണ് സിജെപിയുടെ തീരുമാനമെന്ന് അഭിജീത് ദീപ്കെ പറഞ്ഞു. ഒരേ ലക്ഷ്യത്തിനായി പ്രവർത്തിക്കുന്നതിനാൽ ഇന്ത്യ സഖ്യത്തെ എതിർക്കില്ലെന്നും അദ്ദേഹം വ്യക്തമാക്കി. വിവിധ വിഷയങ്ങളിൽ സംഘടനയുടെ നിലപാട് വ്യക്തമാക്കുന്നതിലൂടെ സമൂഹമാധ്യമങ്ങളിലെ വിമർശനങ്ങൾക്ക് മറുപടി നൽകുകയാണ് സിജെപി നേതൃത്വം.
