അപകടത്തിനുശേഷം പരിക്കേറ്റയാളെ ആശുപത്രിയിലെത്തിച്ച് മുങ്ങി….എംഡിഎംഎയുമായി പ്രതി പിടിയില്‍
വാഹനാപകടമുണ്ടാക്കിയശേഷം പരിക്കേറ്റ സ്‌കൂട്ടര്‍ യാത്രക്കാരനുമായി ആംബുലന്‍സില്‍ ആശുപത്രിയിലെത്തുകയും പിന്നീട് മുങ്ങുകയും ചെയ്ത പ്രതി എം ഡി എം എയുമായി പിടിയില്‍. കൊണ്ടോട്ടി പള്ളിക്കല്‍ കൊലന്‍ കണ്ടിയില്‍ സുബൈറിനെയാണ് (39) നിലമ്പൂര്‍ പൊലീസ് അറസ്റ്റ് ചെയ്തത്. കരിപ്പൂര്‍ വിമാനത്താവളത്തിന് സമീപത്തെ വീട്ടില്‍ ഒളിവില്‍ കഴിയുന്നതിനിടെയാണ് ഇയാള്‍ പിടിയിലായത്. കഴിഞ്ഞ തിങ്കളാഴ്ച കെ.എന്‍.ജി റോഡില്‍ മമ്പാട് ബീബുങ്ങലിലായിരുന്നു അപകടം.
സുബൈര്‍ ഓടിച്ച കാര്‍ എതിര്‍ദിശയില്‍ വന്ന സ്‌കൂട്ടറിലും തുടര്‍ന്ന് രണ്ട് കാറുകളിലും ഇടിക്കുകയായിരുന്നു. അപകടത്തില്‍ സ്‌കൂട്ടര്‍ യാത്രക്കാരന് സാരമായി പരിക്കേറ്റു. ഇതുവഴി വന്ന ആംബുലന്‍സില്‍ പരിക്കേറ്റയാളെ മഞ്ചേരി മെഡിക്കല്‍ കോളജ് ആശുപത്രിയിലേക്ക് കൊണ്ടുപോയി. സുബൈറും ആംബുലന്‍സില്‍ കയറി പരിക്കേറ്റയാളോടൊപ്പം ആശുപത്രിയിലേക്ക് പോയിരുന്നു. അപകടത്തെത്തുടര്‍ന്ന് കാര്‍ പരിശോധിച്ചപ്പോഴാണ് ഡ്രൈവിങ് സീറ്റില്‍നിന്ന് 0.58 ഗ്രാം എം.ഡി.എം.എ പൊലീസ് കണ്ടെടുത്തത്. ഇതോടെ കാര്‍ കസ്റ്റഡിയിലെടുത്ത് അന്വേഷണം ആരംഭിച്ചു. എന്നാല്‍ പരിക്കേറ്റയാളെ ആശുപത്രിയിലെത്തിച്ച ശേഷം സുബൈര്‍ അവിടെനിന്ന് കടന്നുകളയുകയായിരുന്നു. തുടര്‍ന്നാണ് ഇയാളെ കണ്ടെത്തുന്നതിനായി പൊലീസ് അന്വേഷണം ഊര്‍ജിതമാക്കിയത്.
