നാട്ടിക ടോൾ പിരിവ് പ്രശ്നത്തിൽ ഇടപെടുമെന്ന് മുഖ്യമന്ത്രി…
തൃശൂർ: നാട്ടികയിലെ ടോൾ പിരിവ് പ്രശ്നത്തിൽ ഇടപെടുമെന്ന് മുഖ്യമന്ത്രി വി.ഡി. സതീശൻ നിയമസഭയിൽ. പ്രശ്നപരിഹാരത്തിനായി തൃശൂർ ജില്ലാ കളക്ടറെ ചുമതലപ്പെടുത്തിയിട്ടുണ്ടെന്നും മുഖ്യമന്ത്രി അറിയിച്ചു. പ്രതിപക്ഷത്തുനിന്ന് കെ. രാജൻ എംഎൽഎയാണ് വിഷയം സഭയുടെ ശ്രദ്ധയിൽ കൊണ്ടുവന്നത്. നാട്ടികയിൽ സിപിഐ പ്രവർത്തകർ ഉൾപ്പെടെയുള്ളവർക്ക് പൊലീസ് ലാത്തിച്ചാർജിൽ മർദ്ദനമേറ്റതായും അദ്ദേഹം ചൂണ്ടിക്കാട്ടി.
നാട്ടിക ടോൾ പ്ലാസയിലേക്ക് എൽഡിഎഫും യുഡിഎഫും നടത്തിയ പ്രതിഷേധ മാർച്ചുകളിൽ ഇന്നും സംഘർഷമുണ്ടായി. ജില്ലാ കളക്ടർ ഇന്നലെ വിളിച്ചുചേർത്ത സർവകക്ഷി യോഗം തീരുമാനമാകാതെ പിരിഞ്ഞതിനു പിന്നാലെയാണ് ടോൾ പ്ലാസയിലേക്ക് പ്രതിഷേധം ശക്തമായത്. രാവിലെ ആദ്യം പ്രതിഷേധവുമായി എത്തിയത് എൽഡിഎഫാണ്. മാർച്ചിനിടെ പ്രവർത്തകർ ബാരിക്കേഡ് മറികടക്കാൻ ശ്രമിച്ചതോടെ പൊലീസ് ജലപീരങ്കി പ്രയോഗിച്ചു. ഇതിലും പിരിഞ്ഞുപോകാതെ പ്രവർത്തകർ ബാരിക്കേഡ് മറിച്ചിട്ട് മുന്നോട്ടുനീങ്ങാൻ ശ്രമിച്ചതോടെ പൊലീസ് ലാത്തിച്ചാർജ് നടത്തി. ഡിവൈഎഫ്ഐ ബ്ലോക്ക് സെക്രട്ടറി നിസാറിന് തലയ്ക്ക് പരുക്കേറ്റു. ജലപീരങ്കി പ്രയോഗത്തിനിടെ സിപിഐഎം ജില്ലാ സെക്രട്ടറി കെ.വി. അബ്ദുൽ ഖാദറിനും സിപിഐ ജില്ലാ സെക്രട്ടറി കെ.ജി. ശിവാനന്ദനും പരുക്കേറ്റു.
കെപിസിസി ജനറൽ സെക്രട്ടറി ജോസ് വള്ളൂരിന്റെയും കോൺഗ്രസ് നേതാവ് സുനിൽ ലാലുവിന്റെയും നേതൃത്വത്തിലായിരുന്നു യുഡിഎഫിന്റെ പ്രതിഷേധം. ബാരിക്കേഡ് മറികടന്ന ചില പ്രവർത്തകരെ പൊലീസ് ബലം പ്രയോഗിച്ച് അറസ്റ്റ് ചെയ്തു. പ്രവർത്തകർ പിരിഞ്ഞുപോകാതെ തുടർന്നതോടെ ജലപീരങ്കി പ്രയോഗിച്ചു. റോഡിൽ കുത്തിയിരുന്ന യുഡിഎഫ് നേതാക്കളെയും പിന്നീട് അറസ്റ്റ് ചെയ്ത് നീക്കി. പ്രതിഷേധങ്ങൾ അവസാനിച്ചതോടെ പൊലീസ് ബാരിക്കേഡുകൾ മാറ്റി. ഇതിനു പിന്നാലെ ടോൾ കമ്പനി പിരിവ് പുനരാരംഭിച്ചു.
