പിഎം ശ്രീ: നിർണായക ഉപസമിതി അവസാന യോഗം ഇന്ന്

തിരുവനന്തപുരം: പിഎം ശ്രീ പദ്ധതി കേരളത്തിൽ നടപ്പാക്കുന്നതുമായി ബന്ധപ്പെട്ട മന്ത്രിസഭാ ഉപസമിതിയുടെ അവസാന യോഗം ഇന്ന് ചേരും. വൈകുന്നേരം തിരുവനന്തപുരത്താണ് യോഗം. മന്ത്രിമാർ വിവിധ ജില്ലകളിൽ ചുമതല നിർവഹിക്കുന്നതിനാൽ യോഗം ഓൺലൈനായിരിക്കും നടക്കുക. പദ്ധതിയുടെ നിലവിലെ പുരോഗതി, ഉപസമിതി റിപ്പോർട്ടിന്റെ കരട്, സിലബസ്, പദ്ധതിയിലുൾപ്പെടുത്തേണ്ട സ്കൂളുകളുടെ തിരഞ്ഞെടുപ്പ് തുടങ്ങിയ വിഷയങ്ങൾ യോഗത്തിൽ ചർച്ച ചെയ്യും. കേന്ദ്രസർക്കാരുമായി തുടർ ആശയവിനിമയം നടത്തുന്നതിനുള്ള നിലപാടിലും ധാരണയുണ്ടാകുമെന്നാണ് സൂചന.

ഇതിന് മുമ്പ് രണ്ടുതവണ ഉപസമിതി യോഗം ചേർന്നിരുന്നു. വിദ്യാഭ്യാസമന്ത്രി എൻ. ഷംസുദ്ദീൻ അധ്യക്ഷനായ സമിതിയിൽ പി.സി. വിഷ്ണുനാഥ്, എം. ലിജു, റോജി എം. ജോൺ എന്നിവരാണ് അംഗങ്ങൾ. ഉപസമിതി റിപ്പോർട്ട് ഉടൻ സർക്കാരിന് സമർപ്പിക്കുമെന്നാണ് വിവരം. ഉപസമിതി റിപ്പോർട്ടിന്റെ അടിസ്ഥാനത്തിലായിരിക്കും പദ്ധതിയുമായി ബന്ധപ്പെട്ട തുടർനടപടികളെന്ന് യുഡിഎഫ് കൺവീനർ അടൂർ പ്രകാശ് കഴിഞ്ഞ ദിവസം വ്യക്തമാക്കിയിരുന്നു. കേന്ദ്രസർക്കാരുമായി ചില വിഷയങ്ങളിൽ സംസ്ഥാനത്തിന് അഭിപ്രായവ്യത്യാസമുണ്ടെങ്കിലും റിപ്പോർട്ടിന്റെ അടിസ്ഥാനത്തിൽ പിഎം ശ്രീ പദ്ധതിയെക്കുറിച്ചുള്ള അന്തിമ തീരുമാനം കൈക്കൊള്ളുമെന്നും അദ്ദേഹം പറഞ്ഞിരുന്നു.