പയ്യന്നൂരിലെ ഒന്നരവയസ്സുകാരന്റെ മരണത്തിൽ മെഡിക്കൽ ബോർഡ് രൂപീകരിച്ചു….
കണ്ണൂർ: പയ്യന്നൂർ ബേബി മെമ്മോറിയൽ ആശുപത്രിയിൽ അനസ്തേഷ്യ നൽകിയതിന് പിന്നാലെ ഒന്നര വയസ്സുകാരൻ ദേവൻ ശൗര്യ മരിച്ച സംഭവത്തിൽ ഡോക്ടർമാർക്ക് വീഴ്ച സംഭവിച്ചതായി പ്രാഥമിക പോസ്റ്റുമോർട്ടം റിപ്പോർട്ട്. സംഭവത്തിൽ സമഗ്രമായ അന്വേഷണത്തിനായി വിദഗ്ദ്ധ ഡോക്ടർമാർ അടങ്ങിയ മെഡിക്കൽ ബോർഡ് രൂപീകരിച്ചു. ഈ പാനൽ കുട്ടിയുടെ ചികിത്സാ രേഖകൾ വിശദമായി പരിശോധിക്കും.
കുട്ടിക്ക് ജനറൽ അനസ്തേഷ്യ നൽകിയതാണ് മരണത്തിലേക്ക് നയിച്ചിട്ടുണ്ടാകാമെന്നാണ് പരിയാരം മെഡിക്കൽ കോളേജിൽ നടത്തിയ പോസ്റ്റുമോർട്ടം റിപ്പോർട്ടിൽ വ്യക്തമാക്കുന്നത്. കുട്ടിയുടെ മുഖത്തുണ്ടായിരുന്ന പരിക്ക് സാരമുള്ളതായിരുന്നില്ല. അതുകൊണ്ടുതന്നെ അനസ്തീഷ്യ നൽകേണ്ട സാഹചര്യം അവിടെ ഇല്ലായിരുന്നു. കൂടാതെ, ശസ്ത്രക്രിയ നടത്തേണ്ട രീതിയിലുള്ള യാതൊരു മുറിവും ദേവൻ ശൗര്യയുടെ ശരീരത്തിൽ ഉണ്ടായിരുന്നില്ലെന്നും റിപ്പോർട്ട് ചൂണ്ടിക്കാണിക്കുന്നു. അനസ്തേഷ്യ നൽകിയതിനെത്തുടർന്ന് കുട്ടിയുടെ ബ്രെയിനിലേക്കുള്ള (തലച്ചോറിലേക്കുള്ള) ഓക്സിജൻ വിതരണം തടസ്സപ്പെടുകയാണുണ്ടായത്. പത്ത് മിനിറ്റിനുള്ളിൽ തന്നെ തലച്ചോറിലേക്കുള്ള രക്തയോട്ടം കുറഞ്ഞു വന്നതായും പരിയാരത്ത് നടത്തിയ പോസ്റ്റുമോർട്ടം റിപ്പോർട്ടിൽ സൂചിപ്പിക്കുന്നുണ്ട്.
അതേസമയം, മറ്റ് ചില സാഹചര്യങ്ങൾ കൊണ്ടും മസ്തിഷ്ക മരണം സംഭവിക്കാമെന്ന വിലയിരുത്തലുമുണ്ട്. ഇതിൽ കൂടുതൽ വ്യക്തത വരുത്തുന്നതിനായി കുട്ടിയുടെ ആന്തരിക അവയവങ്ങൾ കോഴിക്കോട്ടെ ലാബിൽ രാസപരിശോധനയ്ക്ക് വിധേയമാക്കും. ഇതിന് ശേഷം പോസ്റ്റുമോർട്ടം റിപ്പോർട്ടും, ആശുപത്രിയിൽ നൽകിയ ചികിത്സാ വിവരങ്ങളും മെഡിക്കൽ ബോർഡ് വിശദമായി പരിശോധിച്ച് ആരോഗ്യവകുപ്പിന് റിപ്പോർട്ട് കൈമാറും. ഈ മെഡിക്കൽ ബോർഡ് റിപ്പോർട്ടിന്റെ കൂടി അടിസ്ഥാനത്തിലായിരിക്കും പോലീസിന്റെ തുടർന്നുള്ള കേസ് അന്വേഷണം. സംഭവത്തിന് പിന്നാലെ കേസിൽ ഉൾപ്പെട്ട മൂന്ന് ഡോക്ടർമാരുടെയും മൊബൈൽ ഫോണുകൾ സ്വിച്ച് ഓഫ് ചെയ്ത നിലയിലാണെന്ന് പോലീസ് അറിയിച്ചു. കേസ് അന്വേഷണം ഊർജ്ജിതമായി പുരോഗമിക്കുകയാണ്.
