സ്ത്രീവേഷം കെട്ടി മൂന്ന് വർഷം പ്രണയിച്ചു; ഒടുവിൽ ഒരുമിച്ച് താമസവും തുടങ്ങി; പങ്കാളി പുരുഷനാണെന്ന് തിരിച്ചറിഞ്ഞതോടെ…
ഇൻസ്റ്റാഗ്രാമിലൂടെ സ്ത്രീയാണെന്ന് വ്യാജേന പരിചയപ്പെട്ട് മൂന്ന് വർഷത്തോളം പ്രണയിച്ച പങ്കാളിയെ, പുരുഷനാണെന്ന് തിരിച്ചറിഞ്ഞതിനെ തുടർന്ന് യുവാവ് അടിച്ചുകൊന്നു. ഗുജറാത്തിലെ രാജ്കോട്ടിലാണ് സിനിമാക്കഥകളെ വെല്ലുന്ന ക്രൂരമായ കൊലപാതകം നടന്നത്. സംഭവവുമായി ബന്ധപ്പെട്ട് ബിഹാർ സ്വദേശിയായ ഇരുപതുകാരൻ പിയൂഷ് കുമാറിനെ രാജ്കോട്ട് പൊലീസ് അറസ്റ്റ് ചെയ്തു. ഉത്തർപ്രദേശ് സ്വദേശിയായ ചന്ദൻ കുമാറാണ് കൊല്ലപ്പെട്ടത്.
ജൂൺ 25-നാണ് രാജ്കോട്ട് മസ്കത്ത് ഫാടക് റെയിൽവേ സ്റ്റേഷന് സമീപം സ്ത്രീകളുടെ വസ്ത്രം ധരിച്ച നിലയിൽ ജീർണിച്ച മൃതദേഹം പൊലീസ് കണ്ടെത്തുന്നത്. ട്രെയിൻ തട്ടിയുള്ള അപകടമരണമെന്നാണ് പൊലീസ് ആദ്യം കരുതിയതെങ്കിലും, പോസ്റ്റ്മോർട്ടം റിപ്പോർട്ടിൽ തലയ്ക്കേറ്റ ഗുരുതരമായ പരുക്കാണ് മരണകാരണമെന്ന് വ്യക്തമായി. തുടർന്ന് റെയിൽവേ സ്റ്റേഷൻ പരിസരത്തെ സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണമാണ് പ്രതിയായ പീയൂഷിലേക്ക് എത്തിയത്.
കൊലപാതകത്തിലേക്ക് നയിച്ച വഴി പൊലീസിന്റെ വാക്കുകളിൽ:
“നിഷ കുമാർ, പൂനം എന്നീ പേരുകളിൽ ഇൻസ്റ്റാഗ്രാമിൽ വ്യാജ പ്രൊഫൈലുകൾ നിർമ്മിച്ചാണ് ചന്ദൻ കുമാർ പീയൂഷുമായി സൗഹൃദം സ്ഥാപിക്കുന്നത്. ഈ സൗഹൃദം പിന്നീട് പ്രണയമായി മാറുകയും ഇരുവരും രാജ്കോட்டில் ഒരുമിച്ച് താമസം ആരംഭിക്കുകയും ചെയ്തു. സ്ത്രീ വേഷം ധരിച്ചാണ് ചന്ദൻ പീയൂഷിനൊപ്പം കഴിഞ്ഞിരുന്നത്.
മതപരമായ ആചാരങ്ങളും വ്രതങ്ങളും കാരണമായി പറഞ്ഞ് ചന്ദൻ ലൈംഗികബന്ധത്തിൽ ഏർപ്പെടുന്നതിൽ നിന്നും പലപ്പോഴും ഒഴിഞ്ഞുമാറി. എന്നാൽ കഴിഞ്ഞ ദിവസം ചന്ദൻ മുറിയിൽ ഇരുന്ന് താടി വടിക്കുന്നത് പീയൂഷ് അപ്രതീക്ഷിതമായി കാണാനിടയായി. ഇതോടെ താൻ ഇത്രയും കാലം പ്രണയിച്ച ‘കാമുകി’ സ്ത്രീയല്ലെന്നും, സ്വവർഗാനുരാഗിയായ പുരുഷനാണെന്നും പീയൂഷ് തിരിച്ചറിഞ്ഞു.
വഞ്ചിക്കപ്പെട്ടെന്ന ബോധ്യത്തിൽ ഇരുവരും തമ്മിൽ മുറിയിൽ വെച്ച് രൂക്ഷമായ തർക്കമുണ്ടായി. തുടർന്ന് ചന്ദനെ റെയിൽവേ ട്രാക്കിന് സമീപമുള്ള ആളൊഴിഞ്ഞ സ്ഥലത്തേക്ക് പീയൂഷ് തന്ത്രപൂർവം കൂട്ടിക്കൊണ്ടുപോയി. അവിടെ വെച്ച് വലിയ കല്ലുകൾ ഉപയോഗിച്ച് തലയ്ക്കടിച്ച് കൊലപ്പെടുത്തുകയായിരുന്നു. കൊലപാതകത്തിന് ശേഷം മൃതദേഹം ട്രാക്കിനടുത്തുള്ള പാറക്കെട്ടുകൾക്കിടയിൽ ഒളിപ്പിച്ച ശേഷമാണ് പ്രതി ജോലിക്ക് പോയത്.”
സംഭവത്തിൽ കൂടുതൽ അന്വേഷണം പുരോഗമിക്കുകയാണെന്നും പ്രതിയെ കോടതിയിൽ ഹാജരാക്കി റിമാൻഡ് ചെയ്തതായും പൊലീസ് അറിയിച്ചു.
