കഴുത്തറുത്ത് കൊന്നു, പിന്നാലെ മുങ്ങി….. 13 വർഷത്തിന് ശേഷം സഞ്ജയ് റാണയെ പൊക്കി പോലീസ്

മലപ്പുറം: പാണ്ടിക്കാട് വ്യാപാരിയെ കഴുത്തറുത്ത് കൊലപ്പെടുത്തിയ കേസിൽ ജാമ്യത്തിലിറങ്ങി മുങ്ങിയ പ്രതി 13 വർഷത്തിന് ശേഷം പിടിയിൽ. പശ്ചിമ ബംഗാൾ സ്വദേശിയായ സഞ്ജയ് റാണയെയാണ് (33) പാണ്ടിക്കാട് പോലീസ് ഒഡീഷയിൽ നിന്ന് പിടികൂടിയത്. അതീവ സാഹസികമായാണ് പോലീസ് സംഘം ഇയാളെ വലയിലാക്കിയത്.

2013 നവംബറിലാണ് കേരളത്തെ നടുക്കിയ ആ കൊലപാതകം നടന്നത്. കിഴക്കേ പാണ്ടിക്കാട് സ്വദേശിയായ വ്യാപാരി മുഹമ്മദിനെ പ്രതി കഴുത്തറുത്ത് കൊലപ്പെടുത്തുകയായിരുന്നു. സംഭവത്തിന് ശേഷം അറസ്റ്റിലായ സഞ്ജയ് റാണ, പിന്നീട് കോടതിയിൽ നിന്ന് ജാമ്യം ലഭിച്ചതോടെ നാടുവിടുകയായിരുന്നു. ഒഡീഷയിലേക്ക് മുങ്ങിയ പ്രതി അവിടെ ഒളിവിൽ കഴിഞ്ഞുവരികയായിരുന്നു. ഇയാളെ കണ്ടെത്താൻ പോലീസ് വർഷങ്ങളായി ശ്രമം നടത്തിവരികയായിരുന്നുവെങ്കിലും കൃത്യമായ സൂചനകൾ ലഭിച്ചിരുന്നില്ല.

പ്രതിയെക്കുറിച്ച് ലഭിച്ച രഹസ്യവിവരത്തെ തുടർന്ന് പാണ്ടിക്കാട് പോലീസ് സംഘം ഒഡീഷയിലെത്തുകയായിരുന്നു. പോലീസിനെ വെട്ടിച്ച് കടന്നുകളയാൻ ശ്രമിച്ച പ്രതിയെ ഏറെ പരിശ്രമിച്ചാണ് അന്വേഷണസംഘം കീഴടക്കിയത്. പ്രതിയെ മലപ്പുറത്ത് എത്തിച്ച ശേഷം കോടതിയിൽ ഹാജരാക്കും. വർഷങ്ങൾക്ക് മുമ്പ് നടന്ന കൊലപാതകത്തിലെ പ്രതിയെ പിടികൂടാനായത് പാണ്ടിക്കാട് പോലീസിനെ സംബന്ധിച്ചിടത്തോളം വലിയ നേട്ടമാണ്.