കൊച്ചി മേയർ പദവി വിവാദം; മിനിമോളുടെ പരാമർശത്തിൽ മറുപടി പറയേണ്ടത് പ്രതിപക്ഷ നേതാവ്,  എസ് സതീഷ്

കൊച്ചി മേയർ സ്ഥാനം ലഭിക്കാൻ ലത്തീൻസഭ ഇടപെട്ടെന്ന വി കെ മിനിമോളുടെ പരാമർശത്തിൽ മറുപടി പറയേണ്ടത് പ്രതിപക്ഷ നേതാവ് വി ഡി സതീശനാണെന്ന് സിപിഐഎം എറണാകുളം ജില്ലാ സെക്രട്ടറി എസ് സതീഷ് പറഞ്ഞു. ധാർമികതയുടെ നേതാവാണ് താനെന്ന് സ്വയം പ്രഖ്യാപിക്കുകയും, വളഞ്ഞ വഴികളിലൂടെ സഞ്ചരിക്കുകയും ചെയ്യുകയാണ് പ്രതിപക്ഷ നേതാവെന്നും എസ് സതീഷ് കുറ്റപ്പെടുത്തി. മേയറുടെ പരസ്യപ്രസ്താവനയിൽ സഭ ഇടപെട്ടു എന്നത് വ്യക്തമാണ്. ഒരു സാമൂദായിക സംഘടനയുടെയും തിണ്ണ നെരങ്ങുന്നവരല്ല ഞങ്ങൾ എന്നാണ് പ്രതിപക്ഷനേതാവ് പലതവണ പറഞ്ഞിട്ടുള്ളത്. എന്നാൽ ഈ പറയുന്നതിന് നേർ വിപരീതമായ കാര്യങ്ങളാണ് നടത്തുന്നതെന്ന് പിന്നീട് വരുന്ന ഓരോസംഭവങ്ങളിലൂടെയും തെളിയുകയാണ് എന്നും കൂടാതെ കോണ്‍ഗ്രസില്‍ കാര്യങ്ങള്‍ തീരുമാനിക്കുന്നത് എഐസിസിയോ പ്രവർത്തനപരിചയമോ അല്ലെന്ന് വ്യക്തമായെന്നും എസ് സതീഷ് മാധ്യമങ്ങളോട്   പറഞ്ഞു.