കൊടിക്കുന്നിലിനെതിരെ ആരോപണമുന്നയിച്ച് കെഎസ്യു ജില്ലാ പ്രസിഡന്റ്
കൊല്ലം: കൊടിക്കുന്നില് സുരേഷ് എംപിക്കെതിരെ കെഎസ്യു കൊല്ലം ജില്ലാ പ്രസിഡന്റ് അന്വര് സുല്ഫിക്കര്. ദേശീയ നേതാവ് പാരവെച്ചതാണ് കൊട്ടാരക്കരയിലെ തിരിച്ചടിയ്ക്ക് കാരണമെന്നാണ് അന്വറിന്റെ ആരോപണം. സംസ്ഥാനത്തൊട്ടാകെ വീശിയടിച്ച യുഡിഎഫ് തരംഗം കൊട്ടാരക്കരയില് ഇല്ലാതെപോയതിന് കാരണം കൊടിക്കുന്നില് സുരേഷ് എംപിയാണെന്ന് അന്വര് ഫെയ്സ്ബുക്കില് പങ്കുവെച്ച കുറിപ്പില് ആരോപിക്കുന്നു.
പാര്ട്ടിക്കുവേണ്ടി കഷ്ടപ്പെട്ട ചെറുപ്പക്കാരെ ഇല്ലാതാക്കുന്ന പ്രവൃത്തികളാണ് കൊടിക്കുന്നിലിന്റെ ഭാഗത്തുനിന്ന് ഉണ്ടാകുന്നതെന്നും പാര്ട്ടിയെ ഇല്ലാതാക്കി ജനങ്ങളെ വഞ്ചിച്ച് സ്വന്തം കാര്യം നോക്കി നടക്കുന്ന ഇങ്ങനൊരു നേതാവിനെ പാര്ട്ടിക്കോ ജനങ്ങള്ക്കോ ആവശ്യമില്ലെന്നും അന്വര് പറയുന്നു. കൊടിക്കുന്നില് സുരേഷ് എംപിയുമായി ബന്ധപ്പെട്ട വിഷയില് പാര്ട്ടി നേതൃത്വം കണ്ണുതുറക്കണമെന്നും അദ്ദേഹം ആവശ്യപ്പെട്ടു.
