ഗുരുവായൂർ ആനക്കോട്ടയിലെ കൊമ്പൻ ഗോകുൽ ചരിഞ്ഞു

ഗുരുവായൂർ ദേവസ്വം ആന തറവാട്ടിലെ പേരെടുത്ത കൊമ്പനുകളിൽ ഒന്നായ ഗുരുവായൂർ ഗോകുൽ(35) ചരിഞ്ഞു. ശ്വാസതടസമുണ്ടായിരുന്നുവെന്ന് ആനക്കോട്ട അധികൃതർ അറിയിച്ചു.

ഇന്ന് ഉച്ചയോടെയാണ് ആനകോട്ടയിൽ വെച്ച് അസ്വസ്ഥതകൾ അനുഭവപ്പെട്ടത്. കഴിഞ്ഞവർഷം കൊയിലാണ്ടിയിൽ ഒരു ഉത്സവത്തിനിടെ പീതാംബരൻ എന്ന ആനയിൽ നിന്ന് ഗോകുലിന് കുത്തേൽക്കുകയും ഗുരുതരമായി പരിക്കു പറ്റുകയും ചെയ്തിരുന്നു. പരിക്ക് ആഴത്തിലുള്ളതായിരുന്നു. വളരെ നാളത്തെ ചികിത്സയും ആനയ്ക്ക് നൽകി. പിന്നീട് ആന ക്ഷീണിതനായിരുന്നു. കുറച്ചുനാളായി വിശ്രമത്തിലുമായിരുന്നു. ഉത്സവപ്പറമ്പുകളിൽ ഏറെ ആരാധകരുള്ള ആനകളിൽ ഒന്നാണ് ഗുരുവായൂർ ഗോകുൽ.

ഇക്കുറി തൃശൂർ പൂരത്തിന് പങ്കെടുത്തിരുന്നു. ഒന്നര മാസമായി ഗോകുൽ പുറത്തേക്ക് പോയിരുന്നില്ല. ഗോകുൽ ചരിഞ്ഞതോടെ ആനക്കോട്ടയിലെ ആനകളുടെ എണ്ണം 33 ആയി ചുരുങ്ങി.