പണിപാളി! സിറ്റി പോലീസ് ആസ്ഥാനത്ത് അതിക്രമിച്ചുകയറി പിറന്നാളാഘോഷം, കേക്കുമുറി..ഒടുവിൽ..

കണ്ണൂർ സിറ്റി പോലീസ് ആസ്ഥാനത്ത് അതിക്രമിച്ചുകയറി പിറന്നാൾ ആഘോഷം സംഘടിപ്പിച്ചവർക്കെതിരേ പോലീസ് കേസെടുത്തു. കണ്ടാലറിയാവുന്ന അഞ്ചുപേർക്കെതിരേയാണ് കണ്ണൂർ ടൗൺ പോലീസ് കേസെടുത്തത്. പിറന്നാളാഘോഷത്തിന്റെ വീഡിയോ സാമൂഹികമാധ്യമങ്ങളിൽ പ്രചരിച്ചതിന് പിന്നാലെയാണ് നടപടി.

സംസ്ഥാന പോലീസ് സേനയെ അപകീർത്തിപ്പെടുത്തുന്ന രീതിയിൽ പോലീസ് ഉദ്യോഗസ്ഥരെന്ന വ്യാജേന സിറ്റി പോലീസ് ആസ്ഥാനത്തേക്ക് അതിക്രമിച്ചുകയറി പിറന്നാൾ ആഘോഷം സംഘടിപ്പിക്കുകയും അത് ചിത്രീകരിച്ച് സാമൂഹികമാധ്യമങ്ങളിലൂടെ പ്രചരിപ്പിച്ചെന്നുമാണ് എഫ്‌ഐആറിൽ പറയുന്നത്. ഇത് പോലീസ് സേനയുടെ അന്തസ്സിന് കളങ്കംവരുത്തിയെന്നും എഫ്‌ഐആറിലുണ്ട്.

സെപ്റ്റംബർ 16-നാണ് പിറന്നാൾ ആഘോഷത്തിന്റെ വീഡിയോ സാമൂഹികമാധ്യമങ്ങളിൽ പങ്കുവെച്ചിരുന്നത്. ഒരു യുവതിയുടെ പിറന്നാളിന് ചിലർ സർപ്രൈസ് നൽകുന്നതായിരുന്നു വീഡിയോയിലുണ്ടായിരുന്നത്. പോലീസ് സ്‌റ്റേഷനിൽനിന്ന് വിളിക്കുകയാണെന്ന വ്യാജേനയാണ് ഇവർ യുവതിയെ പോലീസ് ആസ്ഥാനത്തേക്ക് വിളിച്ചുവരുത്തിയത്. തുടർന്ന് ഇവിടെവെച്ച് സർപ്രൈസായി കേക്ക് മുറിച്ച് പിറന്നാൾ ആഘോഷം സംഘടിപ്പിക്കുകയായിരുന്നു.

സിറ്റി പോലീസ് ആസ്ഥാനത്തെ കാന്റീനോട് ചേർന്നുള്ള സ്ഥലത്തുവെച്ചായിരുന്നു കേക്കുമുറിയും പിറന്നാളാഘോഷവും. പോലീസിന്റെ ആയുധങ്ങൾ സൂക്ഷിക്കുന്ന സ്ഥലവും ഇതിന് സമീപത്തുതന്നെയാണ്. പോലീസുകാരെന്ന വ്യാജേനയാണ് ഇവർ പോലീസ് ആസ്ഥാനത്തേക്ക് അതിക്രമിച്ചുകയറിയതെന്നാണ് വിവരം. അതേസമയം, ഇത്തരത്തിൽ അഞ്ചുപേർ ഇവിടെയെത്തി പിറന്നാളാഘോഷം സംഘടിപ്പിച്ചത് പോലീസ് അറിഞ്ഞിരുന്നില്ല. വീഡിയോ പ്രചരിച്ചതോടെയാണ് ഇക്കാര്യം പോലീസ് അറിഞ്ഞതെന്നതും പോലീസിന്റെ സുരക്ഷാവീഴ്ച ചൂണ്ടിക്കാണിക്കുന്നു.