മാസത്തിൽ രണ്ടുതവണ ചൂണ്ടുവിരൽ ഉപയോഗിച്ച് വൈദ്യുതി മീറ്ററിൽ ‘സം സം’ എന്നെഴുതണം.. ദൈവം അനുവദിച്ചാൽ വൈദ്യുതി ബിൽ താനേ കുറയും…
സാധാരണക്കാരെ സംബന്ധിച്ച് വലിയ വെല്ലുവിളിയാണ് വൈദ്യുതി ബിൽ. നല്ലൊരു സംഖ്യയാണ് രണ്ടു മാസം കൂടുമ്പോൾ വൈദ്യുതി ബില്ലിനത്തിൽ നൽകേണ്ടി വരുന്നത്, വൈദ്യുതിച്ചിലവ് കുറച്ച് ഈ തുക കുറയ്ക്കാനൊക്കെ പല മാർഗങ്ങളും നാം സ്വീകരിക്കാറുമുണ്ട്. ഇപ്പോഴിതാ, പാകിസ്ഥാനിലെ ഒരു മുസ്ലീം പുരോഹിതൻ വൈദ്യുതി ബില്ല് കുറയ്ക്കാനായി നൽകുന്ന ഉപദേശമാണ് സൈബറിടങ്ങളിൽ വലിയ ചർച്ചയാകുന്നത്. മൗലാന ആസാദ് ജമീൽ എന്ന മുസ്ലീം പുരോഹിതനാണ് വിചിത്രമായ നിർദ്ദേശവുമായി എത്തുന്നത്.
എക്സ്പ്രസ് ടിവിയിലെ ജാവേരിയ സൗദിൻറെ ഷോയിൽ പങ്കെടുക്കവെയാണ് മൗലാന ആസാദ് ജമീൽ വൈദ്യുതി ബിൽ കുറയ്ക്കാൻ എല്ലാവരും പ്രാർത്ഥിക്കാൻ ആവശ്യപ്പെടുന്നത്. രാജ്യത്ത് കുതിച്ചുയരുന്ന വൈദ്യുതി ബില്ലുകളെക്കുറിച്ചുള്ള അവതാരികയുടെ ചോദ്യത്തിന് മറുപടിയായാണ് പുരോഹിതൻ ഇക്കാര്യം പറയുന്നത്.
ഓരോ ദിവസം ചെല്ലുന്തോറും വൈദ്യുതി ബിൽ വളരെയധികം കൂടിക്കൊണ്ടിരിക്കുകയാണ്. അത് കുറയ്ക്കാൻ എന്തെങ്കിലും ഒരു പ്രാർത്ഥനയോ പ്രതിവിധിയോ പറഞ്ഞുതരാമോയെന്നാണ് ഷോയിൽ അവതാരിക മൗലാനയോട് ചോദിക്കുന്നു. ഈ സമയം പറഞ്ഞുതരാമെന്ന് പറയുന്ന പുരോഹിതൻ ‘മാസത്തിൽ രണ്ടുതവണ ചൂണ്ടുവിരൽ ഉപയോഗിച്ച് വൈദ്യുതി മീറ്ററിൽ ‘സം സം’ എന്ന രണ്ട് വാക്കുകൾ എഴുതണം. ഇന്ന് ഒരു തവണ ഇത് ചെയ്തതിന് ശേഷം വീണ്ടും 15 ദിവസങ്ങൾക്ക് ശേഷം ഇതേ കാര്യം ആവർത്തിക്കണമെന്നും ഇദ്ദേഹം പറയുന്നു. ദൈവം അനുവദിച്ചാൽ നിങ്ങളുടെ വൈദ്യുതി ബില്ല് തീർച്ചയായും കുറയുമെന്നും ഇയാൾ വിഡിയോയിൽ പറയുന്നു.
അടിക്കടി ഉയരുന്ന വൈദ്യുതി ബില്ലുകൾ പ്രശ്നമാകുന്നുണ്ടോ? ഈ പാകിസ്ഥാനി മൗലാനയുടെ കയ്യിൽ ഒരു ദൈവീക പരിഹാരമുണ്ട് എന്ന കുറിപ്പോടെ സോനം മഹാജൻ എന്ന എക്സ് ഉപയോക്താവാണ് വീഡിയോ പങ്കുവെച്ചിരിക്കുന്നത്. ഇതിനോടകം ലക്ഷക്കണക്കിന് ആളുകൾ ഈ വീഡിയോ കണ്ടുകഴിഞ്ഞു.
