കോൺഗ്രസിന്റെ ഫണ്ട് പിരിവിനും പാരയായി ഐഎൻടിയുസി പണപ്പിരിവ്…
കോണ്ഗ്രസിന്റെ തദ്ദേശ തെരഞ്ഞെടുപ്പ് ഫണ്ട് പിരിവിന് പാരയായി ഐഎൻടിയുസി പണപ്പിരിവ് നടത്തുന്നുവെന്ന് തിരുവനന്തപുരം ഡിസിസി. ഫണ്ട് പിരിവ് നിര്ത്താൻ ഐഎൻടിയുസിയോട് നിര്ദേശിക്കണമെന്നാവശ്യപ്പെട്ട് ആവശ്യപ്പെട്ട് ജില്ലയുടെ ചുമതലയുള്ള കെപിസിസി ജനറൽ സെക്രട്ടറിയും ഡിസിസി പ്രസിഡന്റും കെപിസിസി പ്രസിഡന്റ് കെ.സുധാകരനെ കണ്ടു.
കഴിഞ്ഞ ദിവസം ചേര്ന്ന തിരുവനന്തപുരം ഡിസിസി കോര് കമ്മിറ്റിയിൽ ഐഎൻടിയുസി പിരിവിനെതിരെ രൂക്ഷവിമര്ശനമാണ് ഉയര്ന്നത്. മിഷൻ 2025 ന്റെ ഭാഗമായി തദ്ദേശ തെരഞ്ഞെടുപ്പ് ചെലവിനല്ലാതെ മറ്റൊരു പിരിവും വേണ്ടെന്ന് കെപിസിസി നിര്ദേശമുണ്ടായിരിക്കെ പിരിവ് നടത്തുന്നതിനെതിരെയാണ് വിമര്ശനം. ഓരോ വാര്ഡിൽ നിന്നും 50000 രൂപ വീതം പിരിക്കണമെന്നാണ് കെപിസിസി നിര്ദേശം.തെരഞ്ഞെടുപ്പിനല്ലാതെ പിരിവ് നടത്തണമെങ്കിൽ കെപിസിസി അനുമതി തേടണം. മണ്ഡലത്തിൽ നിന്ന് 10000 രൂപ വീതം പിരിക്കാൻ മഹിളാ കോണ്ഗ്രസ് അനുമതി തേടിയപ്പോള് ഇളവ് നൽകിയിരുന്നു. എന്നാൽ, അനുമതി തേടാതെ ഐഎൻടിയുസി പിരിവ് നടത്തുന്നുവെന്നാണ് വിമര്ശനം. ജില്ലാ കമ്മിറ്റികള് കോടിക്കണക്കിന് രൂപയുടെ കൂപ്പണടിച്ച് ഒരു നിയന്ത്രണവുമില്ലാതെ പിരിക്കുന്നുവെന്നാണ് തിരുവനന്തപുരം ഡിസിസി കോര് കമ്മിറ്റിയിൽ ഉയര്ന്ന വിമര്ശനം. ഇനി പാര്ട്ടി പിരിവിന് ഇറങ്ങുമ്പോള് ചില്ലിക്കാശ് കിട്ടില്ലെന്നും തദ്ദേശ തെരഞ്ഞെടുപ്പിൽ പണമില്ലാതെ പാര്ട്ടി സ്ഥാനാര്ഥികള് കഷ്ടപ്പെടുമെന്നും അഭിപ്രായമുണ്ടായി.
