കോൺഗ്രസ് ഭരിക്കുന്ന നഗരസഭയിൽ ചെയർമാനെതിരെ കോൺഗ്രസിന്റെ അവിശ്വാസ പ്രമേയം…
മാവേലിക്കര: കോൺഗ്രസ് ഭരിക്കുന്ന മാവേലിക്കര നഗരസഭയിൽ ചെയർമാനെതിരെ കോൺഗ്രസിന്റെ അവിശ്വാസ പ്രമേയം. നഗരസഭാ ചെയർമാൻ കെ.വി.ശ്രീകുമാറിനെതിരെയാണ് കോൺഗ്രസ് അവിശ്വാസ പ്രമേയ നോട്ടീസ് നൽകിയത്. ബ്ലോക്ക് കോൺഗ്രസ് പ്രസിഡൻ്റും പാർലമെൻ്ററി പാർട്ടി സെക്രട്ടറിയുമായ അനി വർഗീസ് അവതാരകനും ഡി.സി.സി ജനറൽ സെക്രട്ടറിയും കൗൺസിലറുമായ ലളിതാ രവീന്ദ്രനാഥ് അനുവാദകയുമായി ഒപ്പിട്ട അവിശ്വാസപ്രമേ നോട്ടീസ് ആലപ്പുഴ ജെ.ഡി ഓഫീസിൽ കോൺഗ്രസ് പാലമെൻ്ററി പാർട്ടി ലീഡർ നൈനാൻ.സി. കുറ്റിശ്ശേരിയുടെ നേതൃത്വത്തിൽ കോൺഗ്രസ് കൗൺസിലർമാർ നേരിട്ട് എത്തിയാണ് നൽകിയിരിക്കുന്നത്.
കഴിഞ്ഞ തിരഞ്ഞെടുപ്പിൽ കോൺഗ്രസ് – 9, ബി.ജെ.പി – 9, എൽ.ഡി.എഫ് – 9 സ്വതന്ത്രനായി ജയിച്ച ചെയർമാൻ – 1 എന്നതാണ് നഗരസഭയിലെ കക്ഷിനില. സ്വതന്ത്രനായി ജയിച്ച ശ്രീകുമാറിനെ ഒപ്പം കൂട്ടി കോൺഗ്രസ് ഭരണത്തിലെത്തുകയായിരുന്നു. ആദ്യ മൂന്ന് വർഷം ശ്രീകുമാറിന് ചെയർമാൻ സ്ഥാനവും പിന്നീടുള്ള 2 വർഷം കോൺഗ്രസ് ചെയർമാന് പിൻതുണയും എന്നതായിരുന്നു വ്യവസ്ഥ. മൂന്ന് വർഷം പിന്നിട്ടിട്ടും ശ്രീകുമാർ ചെയർമാൻ സ്ഥാനം ഒഴിയാൻ തയ്യാറാകാതിരുന്നതിനെ തുടർന്ന് കോൺഗ്രസ് പിൻതുണ പിൻവലിച്ചതായി അറിയിച്ചിരുന്നു. എന്നാൽ മാസങ്ങൾ കഴിഞ്ഞിട്ടും ചെയർമാനെതിരെ അവിശ്വാസം കൊണ്ടുവരാൻ കോൺഗ്രസ് തയ്യാറാകാതിരുന്നത് വലിയ വിമർശനത്തിന് കാരണമായി. ശ്രീകുമാറിന്റെ പിൻതുണയിൽ വൈസ് ചെയർമാൻ സ്ഥാനവും സ്റ്റാന്റിംഗ് കമ്മറ്റി അദ്ധ്യക്ഷ സ്ഥാനവും നിലനിർത്തുകയും ചെയ്തിരുന്നു. ഇത് വിവാദമായതോടെയാണ് ഇപ്പോൾ ചെയർമാനെതിരെ അവിശ്വാസത്തിന് കോൺഗ്രസ് നോട്ടീസ് നൽകിയിരിക്കുന്നത്.
