കെഎസ്ആർടിസിയിൽ ചൊവ്വാഴ്ച 24 മണിക്കൂർ പണിമുടക്ക്… സമരവുമായി മുന്നോട്ട് പോകാൻ തീരുമാനിച്ചത്….

കെഎസ്ആർടിസിയിൽ ചൊവ്വാഴ്ച്ച പണിമുടക്ക്. ഐഎൻടിയുസി യൂണിയനുകളുടെ കൂട്ടായ്മയായ ട്രാൻസ്‌പോർട്ട് ഡെമോക്രാറ്റിക് ഫെഡറേഷൻ (ടിഡിഎഫ്) ആണ് പണിമുടക്കിന് ആ​ഹ്വാനം ചെയ്തിരിക്കുന്നത്. തിങ്കളാഴ്ച രാത്രി 12 മുതൽ ചൊവ്വാഴ്ച രാത്രി 12 വരെ 24 മണിക്കൂറാണ് പണിമുടക്ക്.

ശമ്പളവും പെൻഷനും കൃത്യമായി വിതരണം ചെയ്യുക, ഡിഎ കുടിശ്ശിക അനുവദിക്കുക, ദേശസാത്കൃത റൂട്ടുകളുടെ സ്വകാര്യവത്കരണം അവസാനിപ്പിക്കുക, ശമ്പളപരിഷ്‌കരണ കരാറിന്റെ സർക്കാർ ഉത്തരവ് ഇറക്കുക തുടങ്ങിയ ആവശ്യങ്ങളുന്നയിച്ചാണ് പണിമുടക്ക്. പണിമുടക്കൊഴിവാക്കാൻ കെഎസ്ആർടിസി സിഎംഡി പ്രമോജ് ശങ്കർ സംഘടന നേതാക്കളുമായി ചർച്ച നടത്തിയിരുന്നു. എന്നാൽ, ചർച്ച പരാജയപെട്ടതിനെ തുടർന്നാണ് സമരവുമായി മുന്നോട്ട് പോകാൻ സംഘടന തീരുമാനിച്ചത്.

ശമ്പളവിതരണത്തിൽ പോലും മാനേജ്‌മെന്റ് ഉറപ്പ് നൽകാത്ത സാഹചര്യത്തിലാണ് പണിമുടക്കിലേക്ക് നീങ്ങുന്നതെന്ന് ടിഡിഎഫ് ഭാരവാഹികൾ പറഞ്ഞു. എട്ടരവർഷത്തിനിടെ ഒരിക്കൽപോലും ശമ്പളവും പെൻഷനും കൃത്യസമയത്ത് നൽകിയിട്ടില്ല. കെ എസ് ആർ ടി സിയിലെ ഡിഎ കുടിശ്ശിക 31 ശതമാനമാണ് . മറ്റൊരു പൊതുമേഖല സ്ഥാപനത്തിലും ഇത്രയും കുടിശ്ശികയില്ല എന്നും ടി ഡി എഫ് ഭാരവാഹികൾ ആരോപിച്ചു.