കാണാതായ വയോധികനെ മരിച്ച നിലയിൽ കണ്ടെത്തി.. മൃതദേഹം കണ്ടയാള്‍ കുഴഞ്ഞുവീണ് മരിച്ചു..
ഇടുക്കി പണിക്കൻകുടിയിൽ കാണാതായ വയോധികനെ മരിച്ച നിലയിൽ കണ്ടെത്തി. മൃതദേഹം നേരിട്ട് കണ്ടയാള്‍ കുഴഞ്ഞുവീണു മരിച്ചു. പണിക്കൻകുടി സ്വദേശി പൊട്ടനാനിക്കൽ തങ്കൻ ( 62 ) നെ ആണ് തൂങ്ങി മരിച്ച നിലയിൽ കണ്ടെത്തിയത്. കഴിഞ്ഞ മാസം 31 മുതലാണ് വയോധികനെ കാണാതായത്. തങ്കനെ തൂങ്ങി മരിച്ച നിലയിൽ കണ്ട പണിക്കൻകുടി സ്വദേശി ജോര്‍ളി ആണ് കുഴഞ്ഞുവീണ് മരിച്ചത്. മൃതദേഹം കണ്ട് കുഴഞ്ഞുവീണ ജോര്‍ളിയെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വയോധികന്‍റെ മൃതദേഹം തൂങ്ങി മരിച്ച നിലയിൽ കണ്ടെത്തിയ സംഭവത്തിൽ പൊലീസ് സ്ഥലത്തെത്തി തുടര്‍ നടപടികള്‍ സ്വീകരിച്ചു. ഇന്‍ക്വസ്റ്റ് നടപടികള്‍ക്കുശേഷം പോസ്റ്റ്‍മോര്‍ട്ടത്തിനായി കൊണ്ടുപോകും.
