ഗൃഹനാഥനെ വീട്ടില്‍ കയറി വെട്ടിക്കൊലപ്പെടുത്തി….സുഹൃത്ത് അറസ്റ്റില്‍
തിരുവനന്തപുരം: തിരുവനന്തപുരം നെയ്യാറ്റിന്‍കരയില്‍ ഗൃഹനാഥനെ വീട്ടില്‍ കയറി വെട്ടിക്കൊലപ്പെടുത്തി. പൂഴിക്കുന്ന് സ്വദേശി രാജനാണ് കൊല്ലപ്പെട്ടത്. പ്രതി വെങ്ങാനൂര്‍ സ്വദേശി അനൂപ് കൃഷ്ണനെ പൊലീസ് അറസ്റ്റ് ചെയ്തു. വീട്ടിൽ ഒറ്റയ്ക്ക് താമസിക്കുകയായിരുന്ന രാജന്‍റെ മൃതദേഹം ഇന്ന് രാത്രി എട്ട് മണിയോടെയാണ് അയല്‍വാസികള്‍ കാണുന്നത്.
കൊലപാതകം ഇന്നലെ നടന്നതാകാനാണ് സാധ്യതയെന്ന് പൊലീസ് പറഞ്ഞു. തല വെട്ടിമാറ്റിയ നിലയിലായിരുന്നു മൃതദേഹം. ശരീരത്തിൽ 35 മുറിവുകളുണ്ട്. കൊല്ലപ്പെട്ട രാജനും അറസ്റ്റിലായ അനൂപ് കൃഷ്നും സുഹൃത്തുക്കളാണെന്ന് പൊലീസ് പറയുന്നു. മദ്യപിച്ച ശേഷം രാജൻ, സ്ഥിരമായി അനൂപ് കൃഷ്ണനെ മര്‍ദ്ദിക്കാറുണ്ടായിരുന്നു. ഇതിന്‍റെ പകയാണ് കൊലപാതകത്തിന് കാരണം എന്നാണ് പൊലീസ് നിഗമനം. സംഭവത്തില്‍ നെയ്യാറ്റിൻകര ഡിവൈഎസ്പിയുടെ നേതൃത്വത്തിൽ അന്വേഷണം തുടങ്ങി.
