വസ്ത്രധാരണ വിവാദം: കൃതി സാനന്റെ രക്ഷാബന്ധൻ പരസ്യം…
വസ്ത്രധാരണത്തെച്ചൊല്ലി വിവാദമുയർന്നതിനെ തുടർന്ന് നടി കൃതി സാനൻ അഭിനയിച്ച രക്ഷാബന്ധൻ പരസ്യചിത്രം പിൻവലിച്ച് പ്രമുഖ ജ്വല്ലറി ബ്രാൻഡായ ഗിവ്. പരസ്യത്തിൽ കൃതി ബിക്കിനി ധരിച്ച് രാഖി കെട്ടുന്നുവെന്ന വിമർശനവുമായി ബിജെപി എംപിയും നടിയുമായ കങ്കണ റണൗട്ട് ഉൾപ്പെടെയുള്ളവർ രംഗത്തെത്തിയതിന് പിന്നാലെയാണ് നടപടി. ഇന്ത്യൻ സംസ്കാരത്തോടും പാരമ്പര്യങ്ങളോടും ഉത്സവങ്ങളോടും തങ്ങൾക്ക് ഏറെ ബഹുമാനമുണ്ടെന്ന് ജ്വല്ലറി പുറത്തിറക്കിയ പ്രസ്താവനയിൽ വ്യക്തമാക്കി.
പുതിയ പരസ്യം സമൂഹത്തിലെ ചില വിഭാഗങ്ങളുടെ വികാരങ്ങളെ വ്രണപ്പെടുത്തിയിട്ടുണ്ടെങ്കിൽ അത് മനഃപൂർവമായിരുന്നില്ലെന്നും അവരുടെ വികാരങ്ങളെ മാനിച്ച് പരസ്യം എല്ലാ മാധ്യമങ്ങളിൽനിന്നും പിൻവലിക്കുകയാണെന്നും കമ്പനി അറിയിച്ചു. ബ്രാലെറ്റ് ധരിച്ച് കൃതി സഹോദരനും വളർത്തുനായയ്ക്കും രാഖി കെട്ടുന്നതാണ് പരസ്യത്തിലുണ്ടായിരുന്നത്. നടി ധരിച്ച വസ്ത്രത്തെച്ചൊല്ലിയാണ് പ്രധാനമായും വിമർശനമുയർന്നത്. കങ്കണ റണൗട്ട് രൂക്ഷ വിമർശനവുമായി രംഗത്തെത്തിയതോടെ വിവാദം കൂടുതൽ ശക്തമായി. തുടർന്ന് സാമൂഹികമാധ്യമങ്ങളിലൂടെ കൃതി കങ്കണയ്ക്ക് മറുപടി നൽകി. കൃതി സാനന് പിന്തുണയുമായി കോൺഗ്രസ് നേതാവ് രാഹുൽ ഗാന്ധിയും രംഗത്തെത്തിയിരുന്നു. വിവാദം ശക്തമായതോടെയാണ് പരസ്യം പിൻവലിക്കുന്നതായി ജ്വല്ലറി ബ്രാൻഡ് ഔദ്യോഗികമായി അറിയിച്ചത്.
