ഗണേഷ് കുമാറിനെ വീണ്ടും ജയിപ്പിക്കണം…ആഹ്വാനത്തിന് പിന്നാലെ കോൺഗ്രസ് നേതാവിനെതിരെ നടപടി

മന്ത്രി കെ ബി ഗണേഷ് കുമാറിനെ അടുത്ത നിയമസഭാ തിരഞ്ഞെടുപ്പിലും വിജയിപ്പിക്കണമെന്ന് ആഹ്വാനം ചെയ്ത കോൺഗ്രസ് നേതാവിനെതിരെ നടപടി. പൊതുപരിപാടിയിൽ വെച്ചായിരുന്നു കൊട്ടാരക്കര വെട്ടിക്കവല ഗ്രാമപഞ്ചായത്ത് തലച്ചിറ വാർഡ് അംഗം അസീസിൻറെ പ്രസംഗം. അസീസിനെ കോൺഗ്രസിന്റെ വാർഡ് പ്രസിഡന്റ് സ്ഥാനത്ത് നിന്ന് മാറ്റുകയും കാരണം കാണിക്കൽ നോട്ടീസ് നൽകുകയും ചെയ്തു. ഇന്നലെ വട്ടിക്കവലയിൽ ചേർന്ന് അടിയന്തര പഞ്ചായത്ത് യോഗത്തിലാണ് തീരുമാനം.

കഴിഞ്ഞ ദിവസം നിരപ്പിൽ- തലച്ചിറ റോഡ് ഉദ്ഘാടനം നടന്നിരുന്നു. ഈ വേദിയിൽ വച്ചാണ് അസീസ് ഗണേഷ് കുമാറിനെ വീണ്ടും ജയിപ്പിക്കണമെന്ന് ആഹ്വാനം ചെയ്തത്. പരിപാടിയിലെ ഉദ്ഘാടകനായിരുന്ന ഗണേഷ് കുമാർ വേദിയിലിരിക്കെയായിരുന്നു അസീസിന്റെ പ്രസംഗം.