ലോട്ടറി അടിച്ചത് നെട്ടൂർ സ്വദേശിനിക്ക് തന്നെ.. പക്ഷെ അവർ മാധ്യമങ്ങൾക്ക് മുന്നിൽ വരില്ല…കാരണം..

2025ലെ തിരുവോണം ബമ്പർ BR 105 ലോട്ടറിയുടെ ഭാ​ഗ്യശാലി നെട്ടൂർ സ്വദേശിയായ സ്ത്രീയാണ്. മണിക്കൂറുകൾ നീണ്ട കാത്തിരിപ്പുകൾക്ക് ഒടുവിൽ തിരുവോണം ബമ്പർ ഭാ​ഗ്യശാലി 12 മണിക്ക് മാധ്യമങ്ങളെ കാണുമെന്ന് ഏജൻറ് ലതീഷ് അറിയിച്ചിരുന്നു. എന്നാൽ അവർക്ക് അതിന് താല്പര്യമില്ലെന്ന വിവരമാണ് പുറത്തുവരുന്നത്. വിജയ എന്ന് കരുതുന്ന ആൾ മാധ്യമങ്ങൾക്ക് മുന്നിൽ വരില്ലെന്ന് ലതീഷ് തന്നെ മാധ്യമങ്ങളെ അറിയിച്ചിട്ടുണ്ട്. നെട്ടൂർ സ്വദേശിയായ വനിതയ്ക്കാണ് ലോട്ടറി അടിച്ചതെന്നാണ് തന്റെ അനുമാനമെന്നും ലതീഷ് ഉറപ്പിച്ചു പറയുന്നു. TH 577825 എന്ന നമ്പറിനാണ് 25 കോടിയുടെ ഒന്നാം സമ്മാനം അടിച്ചിരിക്കുന്നത്.

“അവര് പേടിച്ചിരിക്കുകയാണ്. പാവങ്ങളാണ്. അവര് പൊതുവേദിയിൽ പ്രത്യക്ഷപ്പെടുകയോ പെടാതിരിക്കുകയോ എന്തോ ആകട്ടെ. അത്രയേ എനിക്ക് പറയാൻ പറ്റൂ. ആ സ്ത്രീയ്ക്ക് തന്നെയാണ് ലോട്ടറി അടിച്ചിരിക്കുന്നത്. അങ്ങനെയാണ് ഞാൻ ഉറച്ച് വിശ്വസിക്കുന്നതും. നാളെയോ മറ്റന്നാളോ ബാങ്കിൽ എത്തുമ്പോൾ ഒരുപക്ഷേ നിങ്ങൾക്ക് അറിയാനാകും. അടിച്ച ആൾക്കാരുടെ വീട്ടിലെ ദുരിതങ്ങൾ ഭയങ്കരമാണ്. അതൊക്കെ ഓരോരുത്തർ പറഞ്ഞത് കേട്ട് അവർ ഭയന്നിരിക്കയാണ്. സാധാരണ സ്ത്രീയാണത്. നെട്ടൂര് തന്നെയുണ്ട് അവര്,” എന്നാണ് ലതീഷ് മാധ്യമങ്ങളോട് പറഞ്ഞത്.

ഒറ്റയ്ക്ക് താമസിക്കുന്നൊരു സ്ത്രീയാണ് ഭാഗ്യശാലിയെന്ന് തനിക്ക് ഉറപ്പാണെന്നും സ്ഥിരമായി ലോട്ടറി എടുക്കുന്ന ആളല്ല, ബമ്പറായത് കൊണ്ട് സ്പെഷ്യലായി എടുത്തതാണെന്നും നേരത്തെ ലതീഷ് പറഞ്ഞിരുന്നു.