അമ്പലപ്പുഴയിൽ കാറും ലോറിയും കൂട്ടിയിടിച്ച് 4 മരണം, അപകടം ഇന്ന് പുലർച്ചെ..

ആലപ്പുഴ: ദേശീയ പാതയിൽ അമ്പലപ്പുഴയിൽ ഇന്ന് പുലർച്ചെയുണ്ടായ വാഹനാപകടത്തിൽ ഒരു കുട്ടിയുൾപ്പടെ നാലുപേർ മരിച്ചു. അമ്പലപ്പുഴയ്ക്ക് സമീപം പായൽക്കുളങ്ങരയിൽ വാഗണർ കാറും ലോറിയും കൂട്ടിയിടിച്ചായിരുന്നു അപകടം. കാറിലുണ്ടായിരുന്നവരാണ് മരിച്ച നാലുപേരും. എറണാകുളം ഭാഗത്തേക്ക് പോവുകയായിരുന്ന കാർ എതിർദിശയിൽ വന്ന ലോറിയുമായി കൂട്ടിയിടിക്കുകയായിരുന്നു.

അഞ്ചുപേരാണ് കാറിലുണ്ടായിരുന്നത്. ഒരു സ്ത്രീയെ പരിക്കുകളോടെ ആശുപത്രിയിൽ പ്രവേശിപ്പിച്ചു. കാറിലുണ്ടായിരുന്നവർ വിമാനത്താവളത്തിലേക്ക് പോവുകയായിരുന്നു എന്നാണ് പൊലീസ് പറയുന്നത്. ഇവർ തിരുവനന്തപുരം സ്വദേശികളാണ് എന്നാണ് പൊലീസ് നൽകുന്ന പ്രാഥമിക വിവരം. അപകടത്തിൽ കാർ പൂർണമായി തകർന്നു. ഉള്ളിൽ കുടുങ്ങിക്കിടന്നവരെ ഏറെ പണിപ്പെട്ട് നാട്ടുകാരും ഫയർഫോഴ്സും ചേർന്ന് കാർ വെട്ടിപ്പൊളിച്ചാണ് പുറത്തെടുത്തത്. നാലുപേരും സംഭവസ്ഥലത്തുവച്ചുതന്നെ മരിച്ചു.