മാധ്യമപ്രവർത്തകനെ വർഗീയവാദി എന്നുവിളിച്ചു..ഉണ്ണിത്താനെതിരെ കെയുഡബ്ല്യുജെ…
മാധ്യമപ്രവർത്തകനെ വർഗീയ വാദിയെന്ന് വിളിച്ച യുഡിഎഫ് സ്ഥാനാർഥിയും എംപിയുമായ രാജ്മോഹൻ ഉണ്ണിത്താനെതിരെ മാധ്യമപ്രവർത്തകുടെ സംഘടനയായ കെയുഡബ്ല്യുജെ രംഗത്ത് .തന്നോട് ചോദ്യങ്ങൾ ചോദിക്കവെയാണ് ഉണ്ണിത്താൻ മാധ്യമപ്രവർത്തകനെ വർഗീയവാദി എന്ന് വിളിച്ചത് . രാജ്മോഹൻ ഉണ്ണിത്താന്റെ ഭാഗത്തുനിന്നുണ്ടായ പെരുമാറ്റത്തിൽ സംഘടന പ്രതിഷേധം രേഖപ്പെടുത്തുന്നുവെന്നും മാധ്യമ പ്രവർത്തകനെ വർഗീയവാദിയെന്ന് വിളിച്ചത് ഒരിക്കലും അംഗീകരിക്കാനാകില്ലെന്നും സംഘടന വ്യക്തമാക്കി .പരാമർശ സമയത്ത് തന്നെ ഇത് തിരുത്താനും പിൻവലിക്കണമെന്നും ആവശ്യപ്പെട്ടത് .എന്നാൽ ഉണ്ണിത്താൻ അതിന് തയ്യാറായില്ല .
തെരഞ്ഞെടുപ്പ് സമയമായതിനാലാണ് സംഘടന പരസ്യ പ്രതിഷേധത്തിലേക്ക് പോകാത്തത്. എന്നാൽ, വിഷയം ഡിസിസി നേതൃത്വത്തെയും യുഡിഎഫ് നേതൃത്വത്തെയും അറിയിക്കാനാണ് തീരുമാനം. ഉണ്ണിത്താൻ പ്രസ്താവന തിരുത്തണമെന്നും മാപ്പ് പറയണമെന്നും സംഘടന ആവശ്യപ്പെട്ടു. കാസർകോട് പ്രസ് ക്ലബ് സംഘടിപ്പിച്ച ജനസഭ എന്ന പരിപാടിയിലായിരുന്നു വിവാദത്തിനടിസ്ഥാനമായ സംഭവം നടന്നത്.
