പന്തീരാങ്കാവ് യുഎപിഎ കേസ്.. പ്രതികൾക്ക് നേരെ പൊലീസ് മർദ്ദനം .. കോടതിയിൽ മുദ്രാവാക്യം വിളിച്ച് പ്രതിഷേധം…
പന്തീരാങ്കാവ് യുഎപിഎ കേസില്‍ പ്രതി ചേര്‍ക്കപ്പെട്ട് വിചാരണ നേരിടുന്ന പ്രതികൾക്ക് നേരെ പൊലീസ് ബലം പ്രയോഗിക്കുകയും മർദിക്കുകയും ചെയ്തതായി പരാതി. വിജിത്ത് വിജയന്‍, ഉസ്മാന്‍ എന്നിവരാണ് പരാതി നൽകിയത്. ഇരുവരെയും കൊച്ചിയിലെ എന്‍ഐഎ കോടതിയില്‍ ഹാജരാക്കാനായി കൊണ്ടുവന്നപ്പോഴാണ് സംഭവം. പൊലീസ് ഇരുവരെയും ബലംപ്രയോഗിച്ച് വിലങ്ങണിയിക്കാന്‍ ശ്രമിച്ചെന്നും എതിര്‍ത്തപ്പോള്‍ മര്‍ദിച്ചെന്നുമാണ് പരാതി. ഇരുവരും കോടതി വരാന്തയില്‍ മുദ്രാവാക്യം വിളിച്ച് പ്രതിഷേധിച്ചു. വിശദീകരണം മജിസ്‌ട്രേറ്റിന് മുമ്പാകെ ധരിപ്പിക്കുകയും ചെയ്തു. ശേഷം വിലങ്ങ് മാറ്റാന്‍ പൊലീസിനോട് ആവശ്യപ്പെട്ട കോടതി പരാതി എഴുതി നല്‍കാന്‍ അറിയിച്ചു.
വിദ്യാര്‍ത്ഥികളായ അലന്‍ ഷുഹൈബ്, താഹ ഫസല്‍ എന്നിവരെ മാവോയിസ്റ്റ് ബന്ധം ആരോപിച്ച് അറസ്റ്റ് ചെയ്തിരുന്നു. കേസിലെ മൂന്നാം പ്രതിയാണ് പാണ്ടിക്കാട് സ്വദേശി ഉസ്മാന്‍. കല്‍പറ്റ സ്വദേശി വിജിത്ത് വിജയന്‍ നാലാം പ്രതിയുമാണ്. കേസിന്റെ വിചാരണ ഏതാനും മാസങ്ങളായി എന്‍ഐഎ കോടതിയില്‍ നടന്നുവരികയാണ്.
