അസഹ്യമായ വയറുവേദനയും ഛർദിയുമായി ആശുപത്രിയിൽ, 45കാരിക്ക് നഷ്ടമായത് ഇടത് കൈ…
തലവേദന, ഛർദ്ദി, വയറുവേദന എന്നിവയുമായി ചണ്ഡിഗഡിലെ ഒരു ആശുപത്രിയിൽ ചികിത്സ തേടിയ 45കാരിയുടെ കൈയിൽ ഗാംഗ്രീൻ ബാധിച്ച് അത് മുറിച്ചുമാറ്റേണ്ടി വന്നതായി പരാതി. ഗാംഗ്രീൻ എന്നാൽ ശരീരത്തിന്റെ ഒരു ഭാഗത്തേക്കുള്ള രക്തയോട്ടം നിലയ്ക്കുകയും അവിടെയുള്ള കോശങ്ങൾ നശിക്കുകയും ചെയ്യുന്ന അവസ്ഥയാണ്. മൊഹാലി സ്വദേശിയായ ഗുർമീത് കൗറിനാണ് ഈ അവസ്ഥ വന്നത്. 2020 നവംബറിലാണ് വയറിലെ അസുഖത്തെ തുടർന്ന് അവരെ ആശുപത്രിയിൽ പ്രവേശിപ്പിച്ചത്.
മരുന്ന് നൽകുന്നതിനായി ഡോക്ടർമാർ അവരുടെ ഇടത് കൈയിൽ ഒരു കാനുല ഘടിപ്പിച്ചു. ദിവസങ്ങൾക്കുള്ളിൽ വയറുവേദനയിൽ കുറവുണ്ടായെങ്കിലും, ഇടത് കൈയിൽ വീക്കവും വേദനയും അനുഭവപ്പെട്ടു. എന്നാൽ ഇത് സാധാരണമാണെന്നും കുറച്ച് ദിവസങ്ങൾക്കുള്ളിൽ മാറുമെന്നുമാണ് ഡോക്ടർമാർ അവരെ അറിയിച്ചത്.
എന്നാൽ രാത്രിയോടെ വേദന വർധിക്കുകയും അവരുടെ കൈയുടെ നിറം നീലയായി മാറുകയും കൈക്ക് തളർച്ച അനുഭവപ്പെടുകയും ചെയ്തു. ഉടൻ തന്നെ അവരെ ഓപ്പറേഷൻ തിയേറ്ററിലേക്ക് മാറ്റി. ഗാംഗ്രീൻ ബാധിച്ചതിനാൽ കൈ മുറിച്ചുമാറ്റുന്നത് ഒഴിവാക്കാൻ അടിയന്തര ശസ്ത്രക്രിയ ആവശ്യമാണെന്ന് ഡോക്ടർമാർ അറിയിച്ചു.
