നിയന്ത്രണംവിട്ട ബൈക്ക് മതിലിൽ ഇടിച്ചു..ആലപ്പുഴയിലെ പള്ളി ഇമാം മരിച്ചു…

ബൈക്ക്​ നിയന്ത്രണംവിട്ട്​ മതിലിൽ​ ഇടിച്ചുകയറി പള്ളി ഇമാം മരിച്ചു. ആലപ്പുഴ നൂറനാട്​ മുസ്​ലിം ജുമാമസ്​ജിദ്​ ഇമാം തിരുവനന്തപുരം കിളിമാനൂർ പുതിയകാവ് ഗവ. ഹൈസ്‌കൂളിനുസമീപം ഹസൻ മൻസിലിൽ മുഹമ്മദ് അസ്​ലമാണ് ​(53) മരിച്ചത്. എം.സി റോഡിൽ കോട്ടയം പള്ളം കെ.എസ്.ഇ.ബി ചാർജിങ് സ്​റ്റേഷനുസമീപം വ്യാഴാഴ്ച രാവിലെയായിരുന്നു അപകടം. കോട്ടയത്തുനിന്ന്​ ചിങ്ങവനം ഭാഗത്തേക്ക്​ പോയ എൻഫീൽഡ്​ ബുള്ളറ്റ് മതിലിൽ ഇടിക്കുകയായിരുന്നു. ഇടിയുടെ ആഘാതത്തിൽ ബൈക്ക് ഓടിച്ച മുഹമ്മദ് അസ്​ലം റോഡിൽ തലയിടിച്ചു വീഴുകയായിരുന്നുവെന്ന്​ പൊലീസ്​ പറഞ്ഞു.

വാഹനം വിറ്റതുമായി ബന്ധപ്പെട്ട കാര്യങ്ങൾക്ക്​ മൂവാറ്റുപുഴയിൽ പോയശേഷം വ്യാഴാഴ്ച പുലർച്ചെ നൂറനാട്ടേക്ക്​ മടങ്ങുമ്പോഴായിരുന്നു അപകടം. ചിങ്ങവനം പൊലീസെത്തി ആംബുലൻസിൽ ജില്ല ആശുപത്രിയിൽ​ എത്തിച്ചെങ്കിലും മരണപ്പെട്ടിരുന്നു. തലക്ക്​ ഗുരുതര പരിക്കേറ്റ മുഹമ്മദ് അസ്​ലം സംഭവസ്ഥലത്തുതന്നെ മരിക്കാൻ ഇടയാക്കി.