പഠന മുറിയിൽ നിന്ന് തിരഞ്ഞെടുപ്പ് കളത്തിലേക്ക്; തദ്ദേശ തിരഞ്ഞെടുപ്പിൽ സ്ഥാനാർഥികളായി ഒരേ ക്ലാസിൽ പഠിക്കുന്ന മൂന്ന് സുഹൃത്തുക്കൾ

തദ്ദേശ തിരഞ്ഞെടുപ്പുമായി ബന്ധപ്പെട്ട് കണ്ണൂർ ജില്ലയിൽ രസകരമായ ഒരു സംഭവമാണ് ഇപ്പോൾ ശ്രദ്ധ നേടുന്നത്. ഒരേ ക്ലാസിൽ പഠിക്കുന്നതും, ഒരേ മുറിയിൽ താമസിക്കുന്നതുമായ മൂന്ന് എൽഎൽഎം വിദ്യാർത്ഥികൾ, അനുപ്രിയ കൃഷ്ണ, അഷ്റിൻ കളക്കാട്ട്, അശ്വതി ദാസ് എന്നിവർ ഇപ്പോൾ സിപിഎം സ്ഥാനാർത്ഥികളായി രംഗത്ത് എത്തുകയാണ്. നിയമബിരുദം പൂർത്തിയാക്കിയ ഇവർ അഭിഭാഷക ജോലിക്കൊപ്പം ഉപരിപഠനവും നടത്തിവരികയാണ്. ഇതോടൊപ്പം തിരഞ്ഞെടുപ്പ് പോരാട്ടവും ഇവർക്കൊപ്പം ചേർന്നിരിക്കുകയാണ്.

അനുപ്രിയ കൃഷ്ണ കണ്ണൂർ ജില്ലയിലെ ആലക്കോട് പഞ്ചായത്തിലെ 11-ാം വാർഡിൽ മത്സരിക്കുന്നു. ഓൾ ഇന്ത്യ ലോയേഴ്സ് യൂണിയന്റെ പ്രവർത്തകയായ അനുപ്രിയ, റിട്ട. എസ്‌ഐ എം.ജി. രാധാകൃഷ്ണന്റെയും പ്രിയയുടേയും മകളാണ്.

അഷ്റിൻ കളക്കാട്ട് തൃശൂർ ഇരിങ്ങാലക്കുട നഗരസഭയിലെ 11-ാം വാർഡിലാണ് മത്സരിക്കുന്നത്. സിപിഎം തൃശൂർ ജില്ലാ കമ്മിറ്റി അംഗം ഉല്ലാസ് കളക്കാട്ടിന്റെയും ഫൗഷത്ത് ബീവിയുടേയും മകളായ അഷ്റിൻ, തൃശൂർ ഗവ. ലോ കോളജിലെ മുൻ ചെയർപേഴ്സനും എസ്എഫ്ഐ നേതാവുമാണ്.

അശ്വതി ദാസ് പാലക്കാട് ജില്ലയിലെ കൊല്ലങ്കോട് പഞ്ചായത്തിലെ 6-ാം വാർഡിലാണ് മത്സരിക്കുന്നത്. സിപിഎം കൊല്ലങ്കോട് ഏരിയ കമ്മിറ്റി അംഗമായിരുന്ന പരേതനായ എ. ദേവീദാസിന്റെയും പ്രിയകലയുടേയും മകളാണ് അശ്വതി. തിരുവനന്തപുരം ലോ അക്കാദമി ലോ കോളജിലെ മുൻ യൂണിറ്റ് പ്രസിഡന്റായിരുന്ന അവൾ ഇപ്പോൾ പേരൂർക്കട ഏരിയ വൈസ് പ്രസിഡന്റുമാണ്.

പഠന സൗകര്യാർഥം മൂവരും പാലയാട് ക്യാമ്പസിനടുത്തുള്ള ഒരു വീട്ടിലെ ഒരു മുറിയിൽ താമസിക്കുന്നു. പഠനവും ക്യാമ്പസ് രാഷ്ട്രീയവും നിറഞ്ഞ ദിവസങ്ങൾക്കിടെയാണ് ഇവർ തിരഞ്ഞെടുപ്പ് പ്രചാരണത്തിലേക്ക് ചാടിയത്. ഇപ്പോൾ മൂവരും തിരക്കേറിയ പ്രചാരണ ദിനങ്ങൾക്കാണ് സാക്ഷ്യം വഹിക്കുന്നത്.