‘മുറിയില് കണ്ടെത്തിയത് നേരത്തെ ഉണ്ടായിരുന്ന നെഫ്രോസ്കോപ്പ്…ഡോ. ഹാരിസ്…
തിരുവനന്തപുരം: തന്റെ മുറിയില് നിന്ന് കണ്ടെത്തിയത് നേരത്തേ ഉണ്ടായിരുന്ന നെഫ്രോസ്കോപ്പ് എന്ന ഉപകരണമെന്ന് ഡോ. ഹാരിസ് ചിറക്കല്. കേടുപാട് വന്നപ്പോള് റിപ്പയര് ചെയ്യാന് വേണ്ടി എറണാകുളത്തേക്ക് അയയ്ക്കുകയായിരുന്നു. റിപ്പയര് ചെയ്യാന് വലിയ തുകയാകും എന്ന് എറണാകുളത്തെ കമ്പനി അറിയിച്ചു. ഇതോടെ ഉപകരണങ്ങള് മടക്കി അയക്കാന് കമ്പനിയോട് ആവശ്യപ്പെട്ടു. അങ്ങനെ വന്ന ഉപകരണങ്ങളാണ് റൂമില് ഉണ്ടായിരുന്നതെന്നും ഹാരിസ് ചിറക്കല് പറയുന്നു. കെജിഎംസിടിഎ വാട്സ്ആപ്പ് ഗ്രൂപ്പിലായിരുന്നു ഹാരിസിന്റെ പ്രതികരണം.
നേരത്തേ ഹാരിസ് ചിറക്കലിന്റെ മുറിയില് നടത്തിയ പരിശോധനയില് ഒരു പെട്ടിയില് നിന്ന് ഉപകരണം കണ്ടെത്തിയതായി മെഡിക്കല് കോളേജ് പ്രിന്സിപ്പല് പി കെ ജബ്ബാര് പറഞ്ഞിരുന്നു. ആദ്യഘട്ടത്തില് നടത്തിയ പരിശോധനയില് ഈ പെട്ടി കണ്ടിരുന്നില്ലെന്നും വീണ്ടും നടത്തിയ പരിശോധനയില് ഈ പെട്ടി കണ്ടെത്തിയതില് അസ്വാഭാവികത തോന്നിയതായും പ്രിന്സിപ്പല് പറഞ്ഞിരുന്നു. ഈ ഉപകരണം പുതിയതായി വാങ്ങിയതാണോ എന്ന് പരിശോധിക്കേണ്ടതുണ്ട്. ബില്ലില് മോസിലോസ്കോപ്പ് എന്നാണ് എഴുതിയിരുന്നതെന്നും പ്രിന്സിപ്പല് പറഞ്ഞിരുന്നു. തിരുവനന്തപുരത്ത് നടത്തിയ വാര്ത്താസമ്മേളനത്തിലായിരുന്നു പ്രിന്സിപ്പലിന്റെ പ്രതികരണം.
