ഗുണ്ടാ ആക്രമണം..പുന്നപ്രയിൽ ഗൃഹനാഥനെ ആക്രമിച്ച പ്രതികൾ പിടിയിൽ
അമ്പലപ്പുഴ :പുന്നപ്രയിൽ ഗൃഹനാഥനെ ആക്രമിച്ച കേസിൽ പ്രതികൾ പിടിയിൽ. അമ്പലപ്പുഴ വടക്ക് മൂന്നാം വാർഡ്
വെളിയത്തേഴം വീട്ടിൽ അഭിജിത്ത് (28), പുന്നപ്ര തെക്ക് പഞ്ചായത്ത് നാലാം വാർഡ് വാണിയം പറമ്പിൽ അരുൺ എന്നിവരാണ് ഗൃഹനാഥനെ ആക്രമിച്ച കേസിൽ പിടിയിൽ ആയത്.
പുന്നപ്ര തെക്ക് പഞ്ചായത്ത് ആറാം വാർഡ് ചാത്തന്റെ തറ വീട്ടിൽ ഉണ്ണിയും, അമ്പലപ്പുഴ വടക്ക് പഞ്ചായത്ത് വെളിയത്തേഴം വീട്ടിൽ അഭിജിത്തും തമ്മിൽ കഴിഞ്ഞ ഓണസമയത്ത് വാക്കുതർക്കം നടന്നിരുന്നു. തുടർന്ന് ഈ മാസം 12ന് രാത്രി 9.30 ഓടെ പ്രതികൾ അരുണിന്റ സ്കൂട്ടറിൽ ഉണ്ണിയുടെ കുടുംബവീടായ ചാത്തന്റെ തറ വീട്ടിൽ വന്നു പരതിക്കാരനെ വീട്ടിൽ നിന്നും വിളിച്ചിറക്കി മുഖത്തേക്ക് പെപ്പർ സ്പ്രേ അടിക്കുകയും, കൈയിൽ കരുതിയിരുന്ന ഇരുമ്പ് പൈപ്പ് കൊണ്ട് തലയ്ക്ക് പുറികിൽ അടിച്ചു മുറിവ് ഉണ്ടാക്കുകയും ചെയ്തു . തുടർന്ന് ഇടതു കൈ മസിൽ ഭാഗത്ത് അടിച്ചതിനെ തുടർന്ന് മുറിവുണ്ടാകുകയും, അടികൊണ്ട് താഴെ വീണ ഉണ്ണിയുടെ ഇടതുകാലിൽ ഇരുമ്പ് പൈപ്പ് കൊണ്ട് അടിച്ച് അസ്ഥിക്ക് പൊട്ടൽ വരുത്തുകയും ചെയ്തിരുന്നു. ഇത് കണ്ട് പിടിച്ചുമാറ്റുവാൻ വന്ന ഉണ്ണിയുടെ ബന്ധുക്കളെ അഭിജിത്ത് ഇരുമ്പ് പൈപ്പ് കാണിച്ചു ഭീഷണിപെടുത്തിയശേഷം അരുണിന്റ സ്കൂട്ടറിൽ കയറി രക്ഷപ്പെട്ടു.
ഈ സംഭവത്തിന് ശേഷം പ്രതികൾ ഒരുമാസക്കാലം മൂന്നാർ, ചെന്നൈ എന്നിവിടങ്ങളിൽ ഒളവിൽ കഴിഞ്ഞ ശേഷം എറണാകുളം ഭാഗത്ത് ഒളിച്ച് താമസിക്കുന്നതായി ലഭിച്ച രഹസ്യ വിവരത്തിന്റെ അടിസ്ഥാനത്തിൽ പുന്നപ്ര പൊലീസ് സ്റ്റേഷൻ ഇൻസ്പെക്ടർ മഞജുദാസിന്റെ നേതൃത്വത്തിൽ പൊലീസ് സബ്ബ് ഇൻസ്പെക്ടർ ബോബൻ, സീനിയർ സിവിൽ പൊലീസ് ഓഫീസർമാരായ രതീഷ്, മാഹീൻ, അബൂബക്കർ സിദ്ദീഖ് എന്നിവർ ചേർന്ന് 26 ന് പ്രതികളെ കണ്ടെത്തി അറസ്റ്റ് ചെയ്തു. അമ്പലപ്പുഴ കോടതിയിൽ ഹാജരാക്കിയ പ്രതികളെ റിമാന്റ് ചെയ്തു.
