ശുഭ്മൻ ഗില്ലിന് ചരിത്ര നേട്ടം…. കോലിയുടെ റെക്കോർഡ് ഗില്ലിന് മുന്നിൽ വീണു…. 4000 റൺസ് ക്ലബ്ബിലെ പ്രായം കുറഞ്ഞ താരം
ഐപിഎല്ലിൽ പുതിയ ചരിത്രമെഴുതി ഗുജറാത്ത് ടൈറ്റൻസ് നായകൻ ശുഭ്മൻ ഗിൽ. ലക്നൗ സൂപ്പർ ജയന്റ്സിനെതിരായ മത്സരത്തിൽ 4000 റൺസ് എന്ന നാഴികക്കല്ല് പിന്നിട്ടതോടെ ഈ നേട്ടം കൈവരിക്കുന്ന ഏറ്റവും പ്രായം കുറഞ്ഞ താരമെന്ന റെക്കോർഡ് ഗിൽ സ്വന്തമാക്കി. ഇതിഹാസ താരം വിരാട് കോലിയുടെ ദീർഘകാലത്തെ റെക്കോർഡാണ് ഗിൽ തിരുത്തിക്കുറിച്ചത്.
26 വയസ്സും 216 ദിവസവും പ്രായമുള്ളപ്പോഴാണ് ഗിൽ 4000 റൺസ് ക്ലബ്ബിലെത്തിയത്. 2016-ൽ തന്റെ 27-ാം വയസ്സിൽ ഈ നേട്ടം കൈവരിച്ച വിരാട് കോലിയുടെ (27 വയസ്സും 195 ദിവസവും) റെക്കോർഡാണ് പഴങ്കഥയായത്. ലക്നൗവിനെതിരായ മത്സരത്തിൽ 40 പന്തിൽ 56 റൺസ് നേടിയ ഗിൽ ടീമിന്റെ വിജയത്തിൽ നിർണ്ണായക പങ്കുവഹിച്ചു. 36 പന്തിൽ നിന്നാണ് താരം അർധസെഞ്ചുറി പൂർത്തിയാക്കിയത്. ലക്നൗ ഉയർത്തിയ ലക്ഷ്യം പിന്തുടർന്ന ഗുജറാത്ത് 7 വിക്കറ്റിന് വിജയിച്ചു. ജോസ് ബട്ട്ലറുമായി (60 റൺസ്) ചേർന്ന് ഗിൽ പടുത്തുയർത്തിയ 84 റൺസിന്റെ കൂട്ടുകെട്ടാണ് ഗുജറാത്തിന് അടിത്തറ പാകിയത്. അവസാന ഘട്ടത്തിൽ വാഷിംഗ്ടൺ സുന്ദറും രാഹുൽ തെവാതിയയും ചേർന്ന് ജയം ഉറപ്പിച്ചു.
നേരത്തെ ബാറ്റിംഗിനിറങ്ങിയ ലക്നൗ നിരയിൽ ആർക്കും വലിയ സ്കോർ കണ്ടെത്താനായില്ല. 30 റൺസെടുത്ത എയ്ഡൻ മാർക്രമാണ് ടോപ് സ്കോറർ. ഗുജറാത്തിന് വേണ്ടി നാല് വിക്കറ്റ് വീഴ്ത്തിയ പ്രസിദ്ധ് കൃഷ്ണയാണ് ലക്നൗ ബാറ്റിംഗ് നിരയെ തകർത്തത്.
