രാമക്ഷേത്രം നിർമ്മിക്കാൻ പിന്തുണച്ചിരുന്നെങ്കിൽ കോൺഗ്രസിന് ആർ എസ് എസ് വോട്ട് ചെയ്യുമായിരുന്നു
ആർ എസ് എസ് പിന്തുണയ്ക്കുന്നത് രാഷ്ട്രീയ പാർട്ടികളെയല്ല, ആശയങ്ങളെയും നയങ്ങളെയുമാണെന്ന് ആർ എസ് എസ് മേധാവി മോഹൻ ഭാഗവത്. രാഷ്ട്രീയം വിഭജനത്തിന്റേതാണെന്നും സംഘപരിവാറിന്റെ ലക്ഷ്യം ഒന്നിപ്പിക്കലാണെന്നും അദ്ദേഹം വ്യക്തമാക്കി. രാമക്ഷേത്രം നിർമ്മിക്കാൻ കോൺഗ്രസ് തയ്യാറായിരുന്നെങ്കിൽ ആർ എസ് എസ് പിന്തുണയ്ക്കുക കോൺഗ്രസിനെയായിരുന്നു എന്നും അദ്ദേഹം പറഞ്ഞു.ബെംഗളൂരുവിൽ സംഘടിപ്പിച്ച പരിപാടിയിൽ സംസാരിക്കുകയായിരുന്നു അദ്ദേഹം
‘‘ആർഎസ്എസ് ഒരു രാഷ്ട്രീയ സംഘടനയല്ല. ഞങ്ങൾ തിരഞ്ഞെടുപ്പിൽ പങ്കെടുക്കുന്നില്ല, ആരുടേയും വേണ്ടി പ്രചാരണം നടത്തുന്നുമില്ല. രാഷ്ട്രീയം വിഭജനത്തിന്റേതാണ്; സംഘപരിവാറിന്റെ ലക്ഷ്യം ഒന്നിപ്പിക്കലാണ്,’’ ഭാഗവത് വ്യക്തമാക്കി.
‘‘ഞങ്ങൾ നയങ്ങളെയാണ് പിന്തുണയ്ക്കുന്നത്, പാർട്ടികളെയല്ല. ഉദാഹരണത്തിന് രാമക്ഷേത്രം നിർമ്മിക്കണമെന്നത് ഞങ്ങളുടെ നിലപാടായിരുന്നു. ആ ആശയത്തിന് ബിജെപിയാണ് പിന്തുണ നൽകിയത്. അതേ പിന്തുണ കോൺഗ്രസിൽ നിന്നായിരുന്നെങ്കിൽ, സ്വയംസേവകർ അവരുടെ വോട്ടും കോൺഗ്രസിന് തന്നേ നൽകുമായിരുന്നുവെന്ന് ഞാൻ ഉറപ്പിക്കുന്നു.’’-ഭാഗവത് കൂട്ടിച്ചേർത്തു.
‘‘ഏതെങ്കിലും ഒരു പാർട്ടിയോടും പ്രത്യേക അടുപ്പമില്ല. അങ്ങനെയൊരു ‘സംഗ് പാർട്ടി’ തന്നെ ഇല്ല. എല്ലാ പാർട്ടികളും ഭാരതത്തിന്റെ ഭാഗമാണെന്ന നിലയിലാണ് ഞങ്ങൾ കാണുന്നത്. രാജ്യത്തിന് എങ്ങനെയായിരിക്കണം മുന്നോട്ടുള്ള ദിശ എന്നതിനെ കുറിച്ച് ഞങ്ങൾക്ക് വ്യക്തമായ കാഴ്ചപ്പാട് ഉണ്ട്. ആ ദിശയിൽ രാജ്യത്തെ നയിക്കാൻ കഴിവുള്ളവരെയാകും ഞങ്ങൾ പിന്തുണയ്ക്കുക,’’ – ഭാഗവത് തന്റെ പ്രസംഗത്തിൽ പറഞ്ഞു.
