റിനിയെ പങ്കെടുപ്പിച്ച് CPIMന്റെ പെണ് പ്രതിരോധ സംഗമം.. പ്രസ്ഥാനത്തിന്റെ ഭാഗമാകണമെന്ന് റിനിയോട് കെ ജെ ഷൈന്…
രാഹുല് മാങ്കൂട്ടത്തില് എംഎല്എയ്ക്കെതിരായ നടപടികളിലേക്ക് നയിച്ച പ്രതികരണം നടത്തിയ നടി റിനി ആന് ജോര്ജിനെ പങ്കെടുപ്പിച്ച് സിപിഐഎമ്മിന്റെ പെണ് പ്രതിരോധ സംഗമം. കൊച്ചി പറവൂര് ഏരിയ കമ്മിറ്റിയാണ് സൈബര് ആക്രമണങ്ങള്ക്കെതിരെ പരിപാടി സംഘടിപ്പിച്ചത്. പ്രസ്ഥാനത്തിന്റെ ഭാഗമാകണമെന്ന് റിനിയോട് സിപിഐഎം നേതാവ് കെ ജെ ഷൈന് പ്രസംഗത്തില് അഭ്യര്ഥിച്ചു.മുന് ആരോഗ്യമന്ത്രിയും എംഎല്എയുമായ കെ കെ ശൈലജയാണ് പരിപാടി ഉദ്ഘാടനം ചെയ്തത്.
സ്ത്രീകള്ക്കെതിരെയുള്ള അധിക്ഷേപങ്ങള്ക്കും സൈബര് ആക്രമണങ്ങള്ക്കും എതിരെ പെണ് പ്രതിരോധം എന്ന പേരിലാണ് സിപിഐഎം പറവൂര് ഏരിയ കമ്മിറ്റി പരിപാടി സംഘടിപ്പിച്ചത്. റിനിയുടെ വെളിപ്പെടുത്തലിന് പിന്നാലെയാണ് പാലക്കാട് എംഎല്എ രാഹുല് മാങ്കൂട്ടത്തിലിന് എതിരെ പാര്ട്ടി നടപടിയുണ്ടായത്. സ്ത്രീകള്ക്കുവേണ്ടി സംസാരിക്കാന് രാഷ്ട്രീയമില്ലെന്ന് റിനി പറഞ്ഞു.
ഇപ്പോള് പോലും ഞാന് ഇവിടെ ഭയത്തോട് കൂടിയാണ് നില്ക്കുന്നത്. ഇത് വച്ച് അവര് ഇനി എന്തെല്ലാം കഥകള് പ്രചരിപ്പിക്കുമെന്ന മാനസികമായ ഭയമുണ്ട്. എന്നാല് പോലും ഇവിടെ വരാന് തയാറായതിന്റെ കാരണം സ്ത്രീകള്ക്ക് വേണ്ടി ഒരക്ഷരം എങ്കിലും സംസാരിക്കേണ്ടതിന്റെ ദൗത്യം എനിക്ക് കൂടി ഉണ്ട് എന്ന് തോന്നിയത് കൊണ്ടാണ് എന്നും റിനി വേദിയില് പറഞ്ഞു.മറ്റൊരു പാര്ട്ടിയുമായി നടത്തുന്ന ഗൂഢാലോചനയാണ് എന്ന തരത്തിലേക്ക് വരും എന്നുള്ള കാര്യമുണ്ട്. എനിക്ക് സംസാരിക്കാനുള്ള വേദികളുണ്ടാകുമ്പോള് സ്ത്രീകള്ക്ക് വേണ്ടി സംസാരിക്കണം എന്നുള്ളതാണ്. അതില് പാര്ട്ടി എന്നുള്ളതില്ല. പ്രത്യേകിച്ച് ഒരു രാഷ്ട്രീയം എന്ന് ചിന്തിച്ചിട്ടല്ല ഈ വേദിയില് വന്നത് എന്നും അവർ പറഞ്ഞു.
