മാവോയിസ്റ്റുകൾക്ക് കനത്ത തിരിച്ചടി; സിപിഐ മാവോയിസ്റ്റ് ജനറൽ സെക്രട്ടറി ദേവ്ജി കീഴടങ്ങിയതായി റിപ്പോർട്ട്
മാവോയിസ്റ്റുകൾക്ക് കനത്ത തിരിച്ചടി. സിപിഐ മാവോയിസ്റ്റ് ജനറൽ സെക്രട്ടറി ദേവ്ജി എന്ന ടി തിരുപ്പതി കീഴടങ്ങിയതായി റിപ്പോർട്ട്. ദേവ് ജിയും രാജിറെഡ്ഡിയും അടങ്ങുന്ന 18 അംഗ സംഘം ആസിഫാബാദ് വനത്തിൽ വെച്ച് തെലങ്കാന പോലീസിന് മുൻപിൽ കീഴടങ്ങി എന്നാണ് റിപ്പോർട്ട്. തെലങ്കാന അതിർത്തിയിലെ കരേഗുട്ട വനമേഖലയിൽ മാവോയിസ്റ്റ് വിരുദ്ധ സംഘത്തിൻറെ തിരച്ചിൽ ഊർജ്ജിതമാക്കിയതിന് പിന്നാലെയാണ് കീഴടങ്ങൽ.2025 മെയ് മാസത്തിൽ ഛത്തീസ്ഗഡിലെ നാരായൺപൂരിൽ സുരക്ഷാ സേനയുമായുള്ള ഏറ്റുമുട്ടലിൽ ബസവരാജു കൊല്ലപ്പെട്ടതിനു ശേഷം സിപിഐ മാവോയിസ്റ്റിന്റെ ജനറൽ സെക്രട്ടറി സ്ഥാനം ദേവ് ജി ഏറ്റെടുത്തിരുന്നു. മാർച്ച് 31 ന് സർക്കാർ നിശ്ചയിച്ച സമയപരിധിക്കുള്ളിൽ രാജ്യത്ത് നിന്ന് നക്സലിസം തുടച്ചുനീക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ കഴിഞ്ഞദിവസം ആവർത്തിച്ചിരുന്നു, ഇതിന് പിന്നാലെയാണ് ദേവ് ജി യുടെ കീഴടങ്ങൽ.
