പൊലീസ് സ്റ്റേഷന് മുന്നില്‍ കുത്തിയിരുന്ന് രാഹുലിന്റെ സുഹൃത്ത്.. പ്രതിഷേധം…
അടൂര്‍ പൊലീസ് സ്റ്റേഷന് മുന്നില്‍ കുത്തിയിരുന്ന് പ്രതിഷേധിച്ച് കെഎസ്‌യു സംസ്ഥാന സെക്രട്ടറിയും രാഹുല്‍ മാങ്കൂട്ടത്തില്‍ എംഎല്‍എയുടെ സുഹൃത്തുമായ ഫെന്നി നൈനാന്‍. ലൈംഗികാരോപണ കേസില്‍ ഒളിവിലായ രാഹുല്‍ മാങ്കൂട്ടത്തിലിനെ അന്വേഷിച്ച് പൊലീസ് ഇന്ന് അടൂരിലെ ഫെന്നിയുടെ വീട്ടില്‍ പരിശോധന നടത്തിയിരുന്നു.
പരിശോധനയ്‌ക്കെത്തിയ പൊലീസ് ഉദ്യോഗസ്ഥര്‍ മര്യാദയില്ലാതെയാണ് പെരുമാറിയതെന്നാരോപിച്ചാണ് ഫെന്നി പൊലീസ് സ്റ്റേഷന് മുന്നില്‍ കുത്തിയിരുന്നത്. പൊലീസ് വീട്ടില്‍ എത്തിയപ്പോള്‍ അമ്മ മാത്രമാണ് ഉണ്ടായിരുന്നതെന്ന് ഫെന്നി നൈനാന്‍ പറഞ്ഞു. നഗരസഭയില്‍ സ്ഥാനാർത്ഥിയായ താന്‍ പ്രചരണത്തില്‍ ആയിരുന്നെന്നും ഫെന്നി പറഞ്ഞു. വീട്ടിലെത്തിയവരോട് ആരാണെന്നും എന്താണ് കാരണമെന്നും ചോദിച്ചിട്ട് പറഞ്ഞില്ല. അവര്‍ അമ്മയെ ഭീഷണിപ്പെടുത്തി എന്നും ഫെന്നി പറഞ്ഞു.
അതേ സമയം രാഹുല്‍ മാങ്കൂട്ടത്തിലിന്റെ കൂട്ടുപത്രി ജോബി ജോസഫിന്റെ സുഹൃത്തിന്റെ വീട്ടില്‍ പൊലീസ് സംഘം എത്തി. ജോബി ജോസഫിനെ പറ്റിയുള്ള വിവരങ്ങള്‍ ശേഖരിക്കാന്‍ ആണ് പൊലീസ് എത്തിയത്. പത്തനംതിട്ട മൈലപ്രയിലെ വീട്ടിലെത്തിയാണ് വിവരം ശേഖരിച്ചത്. നോട്ടീസ് നല്‍കി പൊലീസ് മടങ്ങി.
