പകലും രാത്രിയും അസമയങ്ങളിലും ഫോൺ വിളിയും അശ്ശീല സന്ദേശങ്ങളും; ആരോഗ്യപ്രവർത്തകയെ നിരന്തരം ശല്യം ചെയ്ത പൊലീസുകാരനെതിരെ…
മുൻപരിചയത്തിന്റെ പേരിൽ നമ്പർ വാങ്ങി ഫോൺവിളിയും അശ്ലീല സന്ദേശവുമായി ആരോഗ്യ പ്രവർത്തകയെ നിരന്തരം ശല്യം ചെയ്ത പൊലീസുകാരനെതിരെ കേസ്. കോഴിക്കോട് ജില്ലാ ക്രൈം റെക്കോർഡ്സ് ബ്യൂറോയിലെ ഉദ്യോഗസ്ഥനായ ഉണ്ണിക്കൃഷ്ണനെതിരെയാണ് കേസെടുത്തിരിക്കുന്നത്. എരഞ്ഞിപ്പാലം സ്വദേശിയായ യുവതിയ്ക്കാണ് പോലീസ് ഉദ്യോഗസ്ഥൻ നിരന്തരം അശ്ശീല സന്ദേശം അയച്ച് ശല്യം ചെയ്തത്. നേരത്തെ പരിചയം ഉണ്ടായിരുന്ന യുവതിയെ ഈ അടുത്ത കാലത്ത് വീണ്ടും പരിചയം പുതുക്കി ഉദ്യോഗസ്ഥൻ ഫോൺ നമ്പർ വാങ്ങുകയായിരുന്നു.
പിന്നീട് പകലും രാത്രിയും അസമയങ്ങളിലും നിരന്തരമായി ഫോണിൽ വിളിച്ച് ശല്യം ചെയ്തെന്നാണ് പരാതി. അശ്ശീല സന്ദേശങ്ങളുമയച്ചു. തുടർന്ന് യുവതി നടക്കാവ് പൊലീസിനെ സമീപിക്കുകയായിരുന്നു. പരാതിയിൽ കഴമ്പുണ്ടെന്ന് പ്രാഥമിക അന്വേഷണത്തിൽ വ്യക്തമായതിനെത്തുടർന്ന് കേസ് രജിസ്റ്റർ ചെയ്തു. ഈ ഉദ്യോഗസ്ഥനെതിരെ നേരത്തെയും സമാനപരാതികൾ ഉണ്ടായിരുന്നെന്നാണ് സൂചന. നടക്കാവ് പൊലീസ് വിശദമായ അന്വേഷണം ആരംഭിച്ചു. അറസ്റ്റ് ഉൾപ്പെടെയുള്ള നടപടികളിലേക്ക് പൊലീസ് കടന്നിട്ടില്ല.
