നൈട്രോസെപാം സെഡേറ്റീവ് ഗുളികകളുമായി യാത്ര…..കുപ്രസിദ്ധ ഗുണ്ട നീഗ്രോ സുരേഷ് എക്സൈസിന്റെ പിടിയിൽ…
എറണാകുളം: കുപ്രസിദ്ധ ഗുണ്ട നീഗ്രോ സുരേഷ് എക്സൈസിന്റെ പിടിയിലായി. നൈട്രോസെപാം സെഡേറ്റീവ് ഗുളികകളുമായാണ് ഇയാൾ എറണാകുളത്ത് എക്സൈസിന്റെ പിടിയിലായത്. സുരേഷ് ബാലൻ എന്നാണ് ഇയാളുടെ യഥാർത്ഥ പേര്. വിവിധ സ്റ്റേഷനുകളിലായി നിരവധി കേസുകളിൽ പ്രതിയായ ഇയാളെ ഗുണ്ടാലിസ്റ്റിൽ പെടുത്തി തടവിൽ പാർപ്പിച്ചിരിക്കുകയായിരുന്നു. അടുത്തിടെയാണ് പുറത്തിറങ്ങിയത്.
വിദ്യാർത്ഥികളെ കേന്ദ്രീകരിച്ചാണ് ഇയാൾ ലഹരി വിൽപ്പന നടത്തിയിരുന്നത്. ഇടപാടുകാർന്ന് നൽകാനായി മയക്കുമരുന്ന് ഗുളികയുമായി കാത്തുനിൽക്കവെയാണ് ഇയാൾ എക്സൈസിന്റെ വലയിലായത്. നഗരത്തിലെ വിവിധ ഭാഗങ്ങളിൽ കോളേജ് വിദ്യാർത്ഥികൾ അടക്കമുള്ളവർക്ക് മയക്ക് മരുന്ന് എത്തിച്ച് നൽകുന്നത് സുരേഷായിരുന്നു.
മോഷണം, അടിപിടി, ഭവനഭേദനം , ഭീഷിണിപ്പെടുത്തൽ, മയക്കുമരുന്ന് കടത്തൽ തുടങ്ങി നിരവധി കേസുകളിൽ പ്രതിയാണ് ഇയാൾ. വിവിധ സ്റ്റേഷനുകളിൽ സുരേഷിനെതിരെ നിലവിൽ കേസുകൾ ഉണ്ട്. ഗുണ്ടാലിസ്റ്റിൽ പെടുത്തി തടവിൽ പാർപ്പിച്ചിരുന്ന ഇയാൾ അടുത്തിടെയാണ് ജയിലിൽ നിന്ന് ഇറങ്ങിയത്.
മയക്കുമരുന്ന് കൈമാറുന്നതിനായി ഇടപാടുകാരെ കാത്ത് കടവന്ത്ര മാതാനഗർ റോഡിൽ നിൽക്കുകയായിരുന്ന ഇയാളെ എക്സൈസ് സംഘം വളഞ്ഞിട്ട് പിടികൂടുകയായിരുന്നു. ലഹരി ഉപയോഗിച്ചിരുന്ന പ്രതി അക്രമാസക്തനാവുകയും ചെയ്തു. ഏറെ പണിപ്പെട്ടാണ് എക്സൈസ് സംഘം സുരേഷിനെ കീഴടക്കിയത്.
