അമ്മയുടെ മുന്നിൽ ഭിന്നശേഷിക്കാരനായ ഒൻപത് വയസ്സുകാരൻ കാറിടിച്ചു മരിച്ചു

അമ്മയുടെ മുന്നിൽ വച്ച് ഭിന്നശേഷിക്കാരനായ ഒൻപത് വയസ്സുകാരൻ കാറിടിച്ചു മരിച്ചു. കൊല്ലങ്കാന, ഏവിഞ്ചയിലെ സാദിഖ് –ഷംസീന ദമ്പതികളുടെ മൂന്നാമത്തെ മകൻ ഷക്കീർ ആണ് മരിച്ചത്. ശനിയാഴ്ച രാവിലെ 11ന് കൊല്ലങ്കാന മാന്യയിലാണ് അപകടം.

പെരുന്നാളിനായി വസ്ത്രങ്ങൾ വാങ്ങാൻ മാതാവിനോടൊപ്പം കാസർകോട് ടൗണിലേക്ക് പോകുന്നതിനായി ഷക്കീർ ബസ് കാത്തുനിൽക്കുകയായിരുന്നു. അതിനിടെ പെട്ടെന്ന് റോഡ് മുറിച്ചുകടക്കാൻ ശ്രമിക്കുമ്പോഴാണ് അപകടം സംഭവിച്ചത്. മാന്യയിൽ നിന്ന് കാസർകോട് ഭാഗത്തേക്ക് വരികയായിരുന്ന കാർ കുട്ടിയെ ഇടിച്ചുതെറിപ്പിക്കുകയായിരുന്നു. കേൾവിശക്തിയും സംസാരശേഷിയും ഇല്ലാത്ത ഷക്കീറിന് വാഹനത്തിന്റെ ശബ്ദം കേൾക്കാൻ കഴിയാതിരുന്നതായി നാട്ടുകാർ പറയുന്നു.

സംഭവം പ്രദേശത്തെ മുഴുവൻ ദുഃഖത്തിലാഴ്ത്തി. കൂടുതൽ വിവരങ്ങൾ അന്വേഷിച്ചുകൊണ്ടിരിക്കുകയാണെന്ന് പൊലീസ് അറിയിച്ചു.