താപവൈദ്യുത നിലയത്തിലെ കെട്ടിടം തകർന്ന് അപകടം; 9 മരണം

താപവൈദ്യുത നിലയത്തിലെ നിർമാണത്തിലിരുന്ന കെട്ടിടം തകർന്നുവീണ് ഉണ്ടായ അപകടത്തിൽ ഒമ്പത് പേർ മരിച്ചു. അപകടത്തിൽ നിരവധി പേർക്ക് പരിക്കേറ്റു. അസമിൽ നിന്നുള്ള തൊഴിലാളികളാണ് അപകടത്തിൽപ്പെട്ടതെന്നാണ് പ്രാഥമിക വിവരം. അപകട സമയത്ത് 30ലേറെ പേർ ജോലിയിൽ ഉണ്ടായിരുന്നു എന്നാണ് പ്രാഥമിക നിഗമനം. മരണസംഖ്യ ഉയരാൻ സാധ്യതയുണ്ട് എന്നാണ് റിപ്പോർട്ട്. അപകടത്തിൽ പ്രധാനമന്ത്രി നരേന്ദ്രമോദി അനുശോചിച്ചു. മരിച്ചവരുടെ കുടുംബത്തിന് 2 ലക്ഷം രൂപ പ്രധാനമന്ത്രി ധനസഹായം പ്രഖ്യാപിച്ചു.

തമിഴ്നാട്ടിലെ എണ്ണൂരിൽ സ്റ്റീൽ കമാനം സ്ഥാപിക്കുന്നതിനിടെ വൈകിട്ട് 5.30തോടെയാണ് അപകടം ഉണ്ടായത്. നിർമാണ പ്രവർത്തനം പുരോഗമിക്കുന്നതിനിടെ യൂണിറ്റിൻറെ മുൻഭാഗം തകർന്നു വീഴുകയായിരുന്നു. 30 അടി ഉയരത്തിൽ നിന്ന് വീണ കമാനത്തിൻറെ അടിയിൽ തൊഴിലാളികൾ കുടുങ്ങുകയായിരുന്നു. മരിച്ചവർ ഇതരസംസ്ഥാന തൊഴിലാളികൾ ആണെന്നാണ് പ്രാഥമിക വിവരം. പത്തിലേറെ പേർക്ക് പരിക്കേറ്റിട്ടുണ്ട് എന്നാണ് വിവരം. പരിക്കേറ്റവരെ ചെന്നൈയിലെ സ്റ്റാൻലി സർക്കാർ ആശുപത്രിയിലാണ് പ്രവേശിപ്പിച്ചത്.