‘കണ്ടിപ്പ വരുവേൻ’; സിനിമയിലേക്ക് ദളപതിയുടെ മടങ്ങിവരവ് പ്രവചിച്ച് നടി

രാഷ്ട്രീയ പ്രവേശനത്തിനായി സിനിമയോട് വിടപറയാനൊരുങ്ങുന്ന തമിഴ് സൂപ്പർതാരം വിജയ്, അഭിനയരംഗത്തേക്ക് തിരിച്ചുവരുമെന്ന പ്രവചനവുമായി നടി സിന്തിയ ലൂർദ്. വരാനിരിക്കുന്ന ‘ദളപതി 69’ (ജനനായകൻ) എന്ന ചിത്രത്തിന് ശേഷം വിജയ് പൂർണ്ണമായും രാഷ്ട്രീയത്തിൽ ശ്രദ്ധ കേന്ദ്രീകരിക്കുമെന്ന് അറിയിച്ചിരിക്കെയാണ് ആരാധകർക്ക് പ്രതീക്ഷ നൽകുന്ന നടിയുടെ ഈ വെളിപ്പെടുത്തൽ.

തമിഴ് നടി സിന്തിയ ലൂർദ് ആണ് വിജയ് തിരിച്ചുവരുമെന്ന് പറയുന്നത്. നേരത്തെ നടിയുടെ ഒരു പ്രൊമോഷൻ വേളയിൽ വിജയിയോടൊപ്പം അഭിനയിക്കാനുള്ള ആ​ഗ്രഹം പ്രകടിപ്പിച്ചിരുന്നു. “ഞാൻ ദളപതി വിജയ്‌ക്കൊപ്പം അഭിനയിക്കും. അദ്ദേഹം തീർച്ചയായും എൻ്റെ നിർമ്മാണ ചിത്രത്തിൽ അഭിനയിക്കും. ചിലർ പറയുന്നു അദ്ദേഹം സിനിമ ഉപേക്ഷിച്ചു എന്ന്, പക്ഷേ രണ്ട് വർഷത്തിനുള്ളിൽ അദ്ദേഹം അഭിനയത്തിലേക്ക് മടങ്ങിവരുമെന്നാണ് ഞാൻ വിശ്വസിക്കുന്നത്. നിങ്ങൾ അത് കാണും.”, എന്നായിരുന്നു സിന്തിയ അന്ന് പറഞ്ഞത്. ഈ കാര്യത്തിൽ ഒരു മാറ്റവും വന്നിട്ടില്ലെന്നും വിജയ് തിരിച്ചുവരുമെന്നും ​ഗലാട്ടയ്ക്ക് നൽകിയ അഭിമുഖത്തിലും ഇപ്പോൾ സിന്തിയ ആവർത്തിച്ചിരിക്കുകയാണ്.

എച്ച് വിനോദ് സംവിധാനം ചെയ്യുന്ന ചിത്രമാണ് ജനനായകൻ. ബോബി ഡിയോൾ, പൂജാഹെഡ്ഗെ, പ്രകാശ് രാജ്, ഗൗതം വാസുദേവ് മേനോൻ, നരേൻ, പ്രിയാമണി, മമിതാ തുടങ്ങി വമ്പൻ താരനിരയാണ് ചിത്രത്തിലുള്ളത്. സിനിമ എന്ന് റിലീസ് ചെയ്യുമെന്ന കാര്യത്തിൽ ഇപ്പോഴും അനിശ്ചിതത്വം തുടരുകയാണ്. ഛായാഗ്രഹണം സത്യൻ സൂര്യൻ, ആക്ഷൻ അനിൽ അരശ്, ആർട്ട് : വി സെൽവ കുമാർ, കൊറിയോഗ്രാഫി ശേഖർ, സുധൻ, ലിറിക്സ് അറിവ്, കോസ്റ്റ്യൂം പല്ലവി സിംഗ്, പബ്ലിസിറ്റി ഡിസൈനർ ഗോപി പ്രസന്ന, മേക്കപ്പ് നാഗരാജ, പ്രൊഡക്ഷൻ കൺട്രോളർ വീര ശങ്കർ, പി ആർ ഓ ആൻഡ് മാർക്കറ്റിംഗ് കൺസൾട്ടന്റ് പ്രതീഷ് ശേഖർ എന്നിവരാണ് അണിയറ പ്രവർത്തകർ.