മലപ്പുറത്ത് മുസ്‌ലിം ലീഗിൽ കൂട്ടരാജി; രാജിവെച്ചത് 50ലധികം പ്രവർത്തകർ
ചർച്ച ചെയ്ത് തീരുമാനിച്ച വ്യക്തിക്കു പകരം മറ്റൊരാളെ സ്ഥാനാർത്ഥിയാക്കി. മലപ്പുറത്ത് മുസ്‌ലിം ലീഗിൽ കൂട്ടരാജി. തദ്ദേശ തിരഞ്ഞെടുപ്പിന് ദിവസങ്ങൾ മാത്രം ബാക്കിനിൽക്കെയാണ് എആർ നഗർ പഞ്ചായത്തിലെ 22ാം വാർഡ് മുസ്‌ലിം ലീഗ് കമ്മിറ്റിയിലെ കൂട്ട രാജി. വാർഡ് കമ്മിറ്റി നൽകിയ പേര് വെട്ടിമാറ്റി മറ്റൊരു വ്യക്തിയെ സ്ഥാനാർത്ഥിയാക്കിയെന്ന് ആരോപിച്ചാണ് പ്രവർത്തകരുടെ കൂട്ടരാജി.
22ാം വാർഡ് മുസ്‌ലിം ലീഗ് കമ്മിറ്റി ജനറൽ സെക്രട്ടറി ചാലിൽ സിദ്ദീഖ് ബാവ, എംഎസ്എഫ് മണ്ഡലം വൈസ് പ്രസിഡന്റ് മുഹമ്മദ് നജീബ് ഉൾപ്പെടെ 50ലധികം പേരാണ് രാജിവെച്ചത്. തങ്ങൾ ചർച്ച ചെയ്ത് തീരുമാനിച്ച വ്യക്തിയുടെ പേര് മറച്ചുവെച്ച് മറ്റൊരു വ്യക്തിയെ സ്ഥാനാർത്ഥിയായി പരിഗണിച്ചുവെന്നാണ് ആക്ഷേപം. വേങ്ങര മണ്ഡലം കമ്മിറ്റി മുസ്‌ലിം ലീഗ് നേതൃത്വത്തിനെതിരെയാണ് ആരോപണം.
വാർഡ് കമ്മിറ്റി അറിയാതെ മണ്ഡലം, പഞ്ചായത്ത് കമ്മിറ്റികൾ ഒറ്റയ്ക്ക് തീരുമാനമെടുത്തെന്ന് ചാലിൽ സിദ്ദീഖ് ബാവ പറഞ്ഞു. 25 കുടുംബങ്ങളിൽ നിന്ന് 150ഓളം പ്രവർത്തകർ പാർട്ടിയുമായുള്ള ബന്ധം അവസാനിപ്പിച്ചെന്നും നേതാക്കൾ അറിയിച്ചു. നിലവിൽ എആർ നഗർ പഞ്ചായത്ത് പ്രസിഡന്റ് റഷീദ് കൊണ്ടാണത്ത് ആണ് ലീഗ് സ്ഥാനാർത്ഥി.
