ബസ് യാത്രക്കിടെ വയോധികൻ കുഴഞ്ഞുവീണു.. അടിയന്തിര ഇടപെടലിൽ ജീവൻ തിരിച്ചുപിടിച്ച് സഹയാത്രികനായ അഗ്നിരക്ഷാ സേനാംഗം

മലപ്പുറത്ത് ബസ് യാത്രക്കിടെ വയോധികൻ ബോധരഹിതനായി കുഴഞ്ഞുവീണു. സഹയാത്രികനായ അഗ്നിരക്ഷാ സേനാംഗത്തി​ന്റെ ഇടപെടലിൽ വയോധികന് പുതുജീവൻ. മലപ്പുറം എടവണ്ണയിൽ നിന്നും വണ്ടൂരിലേക്ക് പോവുകയായിരുന്ന നിച്ചൂസ് ബസിലാണ് സംഭവം. നിലമ്പൂർ രാമൻകുത്ത് താമസിക്കുന്ന പത്തനംതിട്ട സ്വദേശി 65 കാരനായ സോമൻ ആണ് ബസ് യാത്രക്കിടെ ബോധരഹിതനായി കുഴഞ്ഞുവീണത്. ഈ സമയത്ത് ബസിലുണ്ടായിരുന്ന കോഴിക്കോട് ബാലുശേരി സ്വദേശിയും തിരുവാലി അഗ്നി രക്ഷാ നിലയത്തിലെ ഫയർ ആൻ്റ് റെസ്ക്യു ഓഫീസറുമായ സികെ ജിജേഷാണ് രക്ഷാപ്രവർത്തനം നടത്തിയത്.

സോമന് അടിയന്തിരമായി സിപിആർ നൽകി ഹൃദയമിടിപ്പ് നിലനിർത്തിയ അദ്ദേഹം ജീവൻ തിരിച്ചുപിടിക്കുകയായിരുന്നു. തുടർന്ന് ബസിലുണ്ടായിരുന്ന എല്ലാവരെയും വഴിയിലിറക്കിയ ശേഷം വാഹനം സോമനെയും കൊണ്ട് എടവണ്ണ കുടുംബാരോഗ്യ കേന്ദ്രത്തിലും പിന്നീട് ഇഎംസി ആശുപത്രിയിലും എത്തിച്ചു. പിന്നീട് സോമനെ മഞ്ചേരിയിലെ ജില്ലാ ആശുപത്രിയിലേക്കും മാറ്റി. ഇവിടെ നടത്തിയ പരിശോധനയിൽ സോമന് കാര്യമായ പ്രശ്നങ്ങളൊന്നും കണ്ടെത്താനായില്ല. പിന്നീട് ഇദ്ദേഹത്തെ ഡിസ്‌ചാർജ് ചെയ്തു.