അഡ്ജസ്റ്റ് ചെയ്യണമെന്ന് മണിയൻപിള്ള രാജു പറഞ്ഞു….കുറച്ച് കഴിഞ്ഞ ശേഷം വീണ്ടും കോൾ വന്നു…. അപ്പോൾ….

പന്ത്രണ്ടോളം സിനിമകളിൽ വേഷമിട്ടെങ്കിലും സീരിയലുകളിലൂടെയാണ് നടി ശരണ്യ പ്രേക്ഷക മനസ്സുകളിൽ ഇടംപിടിച്ചത്. വളരെ ചെറുപ്പത്തിൽ തന്നെ ബ്രെയിൻ ട്യൂമർ പിടികൂടിയ ശരണ്യ നിരവധി തവണ ട്യൂമറിനെ അതിജീവിച്ച് തിരിച്ചെത്തിയെങ്കിലും 2021ൽ രോ​ഗത്തിന് കീഴടങ്ങുകയായിരുന്നു. ബ്രെയ്ൻ ട്യൂമറുമായി ബന്ധപ്പെട്ടും തൈറോയ്ഡ് ക്യാൻസറുമായി ബന്ധപ്പെട്ടും പതിനൊന്ന്​ ശസ്​ത്രക്രിയകൾക്ക് വിധേയയായെങ്കിലും ശരണ്യയുടെ ജീവൻ രക്ഷിക്കാനായിരുന്നില്ല. അഭിനയ രം​ഗത്ത് സജീവമായി നിൽക്കുന്നതിനിടെയാണ് താരം രോ​ഗബാധിതയായി മരിക്കുന്നത്. ഇപ്പോഴിതാ, അഭിനയ രം​ഗത്ത് ശരണ്യക്കുണ്ടായ ചില അനുഭവങ്ങളെ കുറിച്ച് വെളിപ്പെടുത്തുകയാണ് ശരണ്യയുടെ അമ്മ. ഒരു യൂട്യൂബ് ചാനലിനോടായിരുന്നു ശരണ്യയുടെ അമ്മയുടെ പ്രതികരണം.

‘ബാലചന്ദ്രമേനോൻ സംവിധാനം ചെയ്ത സീരിയലിലൂടെയാണ് മകൾ അഭിനയരംഗത്ത് സജീവമാകുന്നത്. നല്ല രീതിയിലാണ് അദ്ദേഹം ഞങ്ങളോട് പെരുമാറിയത്. അടുത്തിടെയാണ് അദ്ദേഹത്തെക്കുറിച്ച് ചില കാര്യങ്ങളൊക്കെ വാർത്തയിൽ വന്നിരുന്നു. എനിക്ക് അതുമായി ബന്ധപ്പെട്ട് ഒരുപാട് ഫോൺ കോളുകളും വന്നു. ശരണ്യ ബാലചന്ദ്രമേനോന്റെ സീരിയലിൽ ആണല്ലോ അഭിനയിച്ചത്. എന്തെങ്കിലും പ്രശ്നം ഉണ്ടായിരുന്നോ എന്നൊക്കെ പലരും ചോദിച്ചു.

അതൊക്കെ കേട്ടപ്പോൾ വലിയ സങ്കടമായി.ഞങ്ങൾക്ക് യാതൊരു ബുദ്ധിമുട്ടും ഉണ്ടായിട്ടില്ല. പക്ഷെ അഭിനയത്തിൽ നിന്ന് വലിയ നേട്ടങ്ങളൊന്നും ഉണ്ടായിരുന്നില്ല. ശരണ്യയ്ക്ക് അസുഖം വന്ന സമയത്തും ബാലചന്ദ്രമേനോൻ സാർ ഒരുപാട് സഹായം ചെയ്തിട്ടുണ്ട്. അങ്ങനെ നിരവധി സീരിയലുകളിലും മകൾ അഭിനയിച്ചു. കലാഭവൻ മണിയുടെ സഹോദരിയായി ഒരു സിനിമയിലും അഭിനയിച്ചു.

മ​റ്റൊരു സീരിയൽ അഭിനയിക്കുന്ന സമയത്താണ് ഞങ്ങളെ മണിയൻപിളള രാജു സാർ വിളിക്കുന്നത്. സംസാരത്തിനിടയിൽ അഡ്ജസ്​റ്റ് ചെയ്യണമെന്ന് സാർ പറഞ്ഞതായി മകൾ പറഞ്ഞു. അപ്പോഴേ ഞാൻ വേണ്ടെന്ന് പറഞ്ഞു. കുറച്ച് കഴിഞ്ഞ ശേഷം വീണ്ടും കോൾ വന്നു. അപ്പോൾ ഞാൻ അഡ്ജസ്​റ്റ്‌മെന്റ് എന്താണെന്ന് അദ്ദേഹത്തോട് ചോദിച്ചു. അപ്പോൾ അഭിനയിക്കുന്ന ദിവസങ്ങൾ തമ്മിൽ ക്ലാഷ് ആകരുതെന്നാണ് ഉദ്ദേശിച്ചതെന്ന് സാർ പറഞ്ഞു. അങ്ങനെയാണ് ഛോട്ടാമുംബയിൽ അഭിനയിച്ചത്. പല ഷൂട്ടിംഗ് ലൊക്കേഷനുകളിലും പ്രതികരിച്ചതിന് ശരണ്യയ്ക്ക് പല അവസരങ്ങളും നഷ്ടപ്പെട്ടിട്ടുണ്ട്’- ശരണ്യയുടെ അമ്മ പറഞ്ഞു.

നടി സീമ ജി നായരെക്കുറിച്ചും ശരണ്യയുടെ അമ്മ പറഞ്ഞു. ‘സീമ ജി നായരുടെ സഹായം ഒരിക്കലും മറക്കാൻ സാധിക്കില്ല. നല്ലൊരു മനസിന്റെ ഉടമയാണ് സീമ. ശരണ്യയുടെ ശസ്ത്രക്രിയകൾ നടത്താനുളള പണം തന്ന് സഹായിച്ചത് സീമയാണ്. ശരണ്യയുടെ വിവാഹമോചനം കഴിഞ്ഞ സമയമായിരുന്നു അത്.അവളുടെ മരണശേഷവും എന്നെ ജീവിതത്തിലേക്ക് തിരികെ കൊണ്ടുവന്നതും സീമയാണ് ‘- അമ്മ വ്യക്തമാക്കി.