മാവേലിക്കര നഗരസഭയിൽ ഇത്തവണയും 9 + 9 + 9 + 1 ആകുമോ ?? ആർക്കും പിടികൊടുക്കാതെ മാവേലിക്കര…

മാവേലിക്കര- ആദ്യഘട്ട തിരഞ്ഞെടുപ്പ് പ്രവർത്തനം പൂർത്തിയാകുമ്പോൾ മാവേലിക്കര നഗരസഭയിലെ 28 വാർഡുകളിലേയും സ്ഥാനാർത്ഥികളുടെ പ്രവർത്തനവും ജനങ്ങളുടെ പ്രതീക്ഷകളും നൽകുന്ന സൂചനകൾ നാല് ദിവസങ്ങളായി 140 ന്യൂസ് പ്രസിദ്ധീകരിക്കുകയാണ്. ഒരോ വാർഡുകളിലും ഞങ്ങളുടെ റിപ്പോർട്ടർ നേരിട്ടെത്തി ശേഖരിച്ച വിവരങ്ങളാണ് വായനക്കാരുടെ മുന്നിൽ എത്തിക്കുന്നത്. രാഷ്ട്രീയ, സാമുദായിക, സാംസ്കാരിക മേഖലയിലെ വ്യത്യസ്ത വ്യക്തിത്വങ്ങളെയാണ് ഈ റിപ്പോർട്ട് തയ്യാറാക്കാൻ ഞങ്ങൾ സമീപിച്ചത്.

വാർഡ്-1 മറ്റം വടക്ക്

നഗരസഭ മുൻ ചെയർപേഴ്സൺ എസ്.ബിന്ദുവാണ് യു.ഡി.എഫ് സ്ഥാനാർത്ഥിയായി മത്സരിക്കുന്നത്. ബി.ജെ.പിയിൽ നിന്ന് ധന്യയും ഇടത് സ്ഥാനാർത്ഥിയായി അബിത കൃഷ്ണനും ജനവിധി തേടുന്നു. ബി.ജെ.പിക്ക് സ്വാധീനമുള്ള വാർഡിൽ പക്ഷേ ബിന്ദു ശക്തമായ പ്രവർത്തനം കാഴ്ചവെച്ചിട്ടുണ്ട്.

വാർഡ്-2 കുരുവിക്കാട്

5 സ്ഥാനാർത്ഥികൾ മത്സരിക്കുന്ന ഇവിടെ ബി.ജെ.പിയുടെ സിറ്റിംഗ് കൗൺസിലർ മേഘനാഥ് വീണ്ടും ജനവിധി തേടുന്നു. എന്നാൽ വാർഡിലെ ബി.ജെ.പി കൗൺസിലറായിരുന്ന ജയശ്രി പാർട്ടി വിടുകയും വിമത സ്ഥാനാർത്ഥിയെ രംഗത്തിറക്കുകയും ചെയ്തിരിക്കുന്നത് ക്ഷീണം ഉണ്ടാക്കുന്നു. വിമതനായി മത്സരിക്കുന്ന ശരത് രാജ് പിടിക്കുന്ന വോട്ടുകൾ ബി.ജെ.പിയെ ബാധിക്കും. ഇതിനിടെ ബി.ജെ.പിയിലെ വിമത വിഭാഗം സി.പി.എം സ്ഥാനാർത്ഥിക്ക് അനുകൂലമായ നിലപാട് സ്വീകരിക്കാനുള്ള നീക്കവും നടക്കുന്നുണ്ട്. ഇത് സി.പി.എം സ്ഥാനാർത്ഥി ശിവരാജിന് വിജയപ്രതീക്ഷ നൽകുന്നതാണ്. കോൺഗ്രസ് ജില്ലാ നേതാവ് കെ.എൽ.മോഹൻലാൽ ആണ് യു.ഡി.എഫ് സ്ഥാനാർത്ഥി. ഇദ്ദേഹവും വിജയപ്രതീക്ഷയിലാണ്. സ്വതന്ത്രയായി ശ്രീലതയും മത്സരിക്കുന്നു.

വാർഡ്-3 കണ്ടിയൂർ

കോൺഗ്രസിൽ നിന്ന് ശോഭ മധുവാണ് ജനവിധി തേടുന്നത്. വാർഡിൽ സജീവമാണ് എന്നതാണ് സ്ഥാനാർത്ഥിയുടെ മുതൽകൂട്ട്. സിറ്റിംഗ് കൗൺസിലർ ഗോപന്റെ പിൻതുണയും ഇവർക്ക് സഹായമാകുന്നു. ബി.ജെ.പി സ്ഥാനാർത്ഥി ലത.ജി ഇവർക്ക് ശക്തമായ വെല്ലുവിളി ഉയർത്തുന്നുണ്ട്. ഇടത് സ്ഥാനാർത്ഥിയായി സിന്ധുവാണ് മത്സരരംഗത്തുള്ളത്. മൂന്ന് സ്ഥാനാർത്ഥികളും പ്രചരണത്തിൽ ഒപ്പത്തിനൊപ്പമാണ്.

വാർഡ്-4 മുൻസിപ്പൽ ബസ് സ്റ്റാന്റ്

സിറ്റിംഗ് കൗൺസിലറും യു.ഡി.എഫ് കൺവീനറുമായ കെ.ഗോപൻ ആണ് കോൺഗ്രസ് സ്ഥാനാർത്ഥി. വാർഡിൽ വ്യക്തമായ സ്വാധീനമുള്ള ഗോപനെ നേരിടാൻ സി.പി.എമ്മിന്റെ യുവരക്തമായ അനൂപ് മാത്യു പോളിനെയാണ് രംഗത്തിറക്കിയിരിക്കന്നത്. എസ്.എഫ്.ഐ ഏരിയാ സെക്രട്ടറിയായിരുന്നു അനൂപ്. ബി.ജെ.പി സ്ഥാനാർത്ഥി എസ്.ആർ.അശോക് കുമാറും ശക്തമായ മത്സരം കാഴ്ചവെയ്ക്കുന്നുണ്ട്. സ്വതന്ത്രനായി സുദീപും മത്സരരംഗത്തുണ്ട്.

വാർഡ്-5 പ്രായിക്കര ടെമ്പിൾ

പ്രായിക്കരയിൽ വ്യക്തമായ സ്വാധീനമുള്ള സിറ്റിംഗ് കൗൺസിലർ സജീവ് പ്രായിക്കരയാണ് കോൺഗ്രസ് സ്ഥാനാർത്ഥി. ഇടത് സ്വതന്ത്രനായി സുദീപ് സഖറിയ ജോണും ബി.ജെ.പി സ്ഥാനാർത്ഥിയായി അനീഷും മത്സരിക്കുന്നു. ഓർത്തഡോക്സ് വോട്ടുകളും ഗോമടത്ത് കുടുംബത്തിന്റെ സ്വാധീനവും ഇടത് പാളയത്തിലേക്ക് എത്തിക്കാനുള്ള ശ്രമത്തിലാണ് ഇടത് പാളയം.

വാർഡ്-6 പ്രായിക്കര

യു.ഡി.എഫിന് വിമത ഭീഷണി ഉള്ള വാർഡിൽ കൈപ്പത്തി ചിഹ്നത്തിൽ സിൽജ തോമസും സ്വതന്ത്രയായി അനിത മോഹനും മത്സരിക്കുന്നു. കോൺഗ്രസ് വോട്ടുകൾ ഭിന്നിച്ചാൽ അത് ഗുണം ചെയ്യുന്നത് ഇടത് സ്വതന്ത്രയായ ലീലാമണിക്കാവും. കോൺഗ്രസിന്റെ സിറ്റിംഗ് സീറ്റിൽ ഇടത് പാളയം വിജയപ്രതീക്ഷയിലാണ്. ബി.ജെ.പി സ്ഥാനാർത്ഥി രതീദേവിയും ശക്തമായ മത്സരം കാഴ്ചവെയ്ക്കുന്നുണ്ട്.

വാർഡ്-7 ഗവ.ഹോസ്പിറ്റൽ

സ്വതന്ത്ര സ്ഥാനാർത്ഥി ശക്തമായ മത്സരം കാഴ്ചവെക്കുന്ന വാർഡാണ് ഗവ.ഹോസ്പിറ്റൽ വാർഡ്. സിറ്റിംഗ് കൗൺസിലർ ബിനുവിന്റെ ഭാര്യ സജിനി ജോൺ ആണ് ഇവിടെ സ്വതന്ത്രയായി മത്സരിക്കുന്നത്. ഇടത് സ്വതന്ത്ര ബിന്ദു എലിസബത്ത് ഉമ്മനും മത്സരത്തിൽ സജീവമാണ്. യു.ഡി.എഫിൽ നിന്ന് ഏലിയാമ്മ.കെ കോശിയും ബി.ജെ.പിയിൽ നിന്ന് പ്രസന്ന മുരളിയുമാണ് മത്സരരംഗത്തുള്ളത്.
8 മുതൽ 14 വരെയുള്ള വാർഡുകളിലെ അവലോകനം നാളെ.