നായ കുരയ്ക്കുന്നതുകേട്ട് ജനാലയിലൂടെ നോക്കിയപ്പോള്‍ കണ്ടത് ‘.. ഭീതി ഒഴിയാതെ ചാലക്കുടി..തിരച്ചില്‍..
ചാലക്കുടിയില്‍ വീണ്ടും പുലിയെ കണ്ടതായി നാട്ടുകാര്‍. വളര്‍ത്തുന്ന നായയെ പുലി പിടികൂടാന്‍ ശ്രമിച്ചു എന്നാണ് നാട്ടുകാര്‍ പറയുന്നത്. അന്നനാട് കുറുവക്കടവ് സ്വദേശി ജനാര്‍ദ്ദന മേനോന്റെ വീട്ടിലെ വളര്‍ത്തുനായയെ ആണ് പുലി ആക്രമിച്ചത്. നായയുടെ കുരകേട്ട് വീട്ടുകാര്‍ ജനാലയിലൂടെ ടോര്‍ച്ചടിച്ച് നോക്കിയപ്പോഴാണ് പുലി ആക്രമിക്കുന്നത് കണ്ടത്. ചാലക്കുടി നഗരത്തില്‍ പുലിയെ കണ്ടതിന് പിന്നാലെയാണ് അന്നനടയിലും പുലിയുടെ സാന്നിധ്യം സ്ഥിരീകരിച്ചിരിക്കുന്നത്.
ജനാലയിലൂടെ നോക്കിയപ്പോള്‍ നായയെ ആക്രമിക്കുന്ന പുലിയെ വ്യക്തമായി കണ്ടതായി വീട്ടുടമയായ സ്ത്രീ പറയുന്നു. നായയുടെ അസാധാരണമായ കുരകേട്ടാണ് നോക്കിയത്, അപ്പോള്‍ കണ്ടത് പുലി നായയനെ കടിച്ചുപിടിച്ച് നില്‍ക്കുന്നതാണ്, വീട്ടുടമ നന്ദിനി പറയുന്നു. നായയെ കടിച്ചുവലിച്ച് കൊണ്ടുപോകാനാണ് പുലി ശ്രമിച്ചുകൊണ്ടിരുന്നതെന്നും നായയെ ചങ്ങലകൊണ്ട് കെട്ടിയിട്ടിരുന്നതിനാല്‍ ഇതിന് സാധിക്കാതിരിക്കുന്നതാണ് തങ്ങള്‍ ജനലിലൂടെ കണ്ടതെന്നും വീട്ടിലുണ്ടായിരുന്നവര്‍ പറയുന്നു.
പുലിയെ കണ്ട് നന്ദിനി ഒച്ചവെക്കുകയും മകനെ വിളിച്ചുണര്‍ത്തുകയും ചെയ്തു. മകനും നാട്ടുകാരും ചേര്‍ന്ന് കൂടുതല്‍ ബഹളംവയ്ക്കുകയും സമീപപ്രദേശത്തെ ലൈറ്റുകള്‍ ഇടുകയും ചെയ്തതോടെയാണ് പുലി നായയെ ഉപേക്ഷിച്ച് ഓടിമറഞ്ഞത്. സംഭവമറിഞ്ഞെത്തിയ വനംവകുപ്പ് ഉദ്യോഗസ്ഥരും നാട്ടുകാരും ചേര്‍ന്ന് സ്ഥലത്ത് തിരച്ചില്‍ നടത്തി. പുലിയുടെ ആക്രമണത്തില്‍ നായയ്ക്ക് കഴുത്തിനും മുഖത്തിനും പരിക്കേറ്റിട്ടുണ്ട്. കഴിഞ്ഞ ദിവസം ചാലക്കുടി നഗരത്തില്‍ പുലിയിറങ്ങിയ ദൃശ്യങ്ങള്‍ വലിയതോതില്‍ പ്രചരിച്ചിരുന്നു. പിന്നാലെയാണ് അന്നനാട്ടിലും പുലി ഇറങ്ങിയ വാര്‍ത്ത പുറത്തുവരുന്നത്. നാട്ടുകാര്‍ കനത്ത ഭീതിയിലാണ്.
