100 രൂപയുടെ മുദ്രപത്രത്തിൽ വിവാഹ ക്ഷണക്കത്ത്; അതും ആധാരമെഴുത്ത് ശൈലിയിൽ
വിവാഹ ക്ഷണക്കത്തുകൾ സേവ് ദ ഡേറ്റിലേക്ക് വഴിമാറിയിട്ട് അധിക കാലം ആയിട്ടില്ല. പല സേവ് ദ ഡേറ്റ് ഫോട്ടോഷൂട്ടുകളും സമൂഹ മാധ്യമങ്ങളിൽ വൈറലാകാറുണ്ട്. എന്നാൽ ഇപ്പോൾ ഒരു വിവാഹ ക്ഷണക്കത്താണ് സൈബറിടങ്ങളിൽ വ്യാപകമായി പ്രചരിക്കുന്നത്. കരുനാഗപ്പള്ളി തൊടിയൂർ സ്വദേശി കെ രാജേന്ദ്രന്റെ മകൾ ഇന്ദുവിന്റെ വിവാഹ ക്ഷണക്കത്താണ് വൈറലാകുന്നത്.
ആധാരമെഴുത്താണ് രാജേന്ദ്രന്റെ തൊഴിൽ. മകളുടെ വിവാഹ ക്ഷണക്കത്ത് തയ്യാറാക്കുമ്പോൾ താൻ ഇത്രയും നാൾ ചെയ്ത തൊഴിലിനോടുള്ള ആത്മാർത്ഥതയും സ്നേഹവും പ്രകടിപ്പിക്കാൻ അദ്ദേഹം തീരുമാനിച്ചു. ഇതോടെ സ്വന്തം കൈപ്പടയിൽ ആധാരമെഴുത്ത് ശൈലിയിൽ തന്നെ മകളുടെ ക്ഷണക്കത്ത് തയ്യാറാക്കിയത്. തീർന്നില്ല, കത്ത് തയ്യാറാക്കിയതാകട്ടെ 100 രൂപയുടെ മുദ്രപത്രത്തിൽ സർക്കാർ മുദ്രകളെല്ലാം ഒഴിവാക്കിയ ശേഷവും.
വിവാഹിതരാകാൻ പോകുന്ന മകൾ ഇന്ദുവിന്റെയും ഹരീഷ് കുട്ടികൃഷ്ണന്റെയും ചിത്രങ്ങൾ ഉൾപ്പെടുത്തിയാണ് ക്ഷണക്കത്ത് തയാറാക്കിയിരിക്കുന്നത്. താൻ ഇത്രയും കാലം ചെയ്തുവന്നിരുന്ന തൊഴിലിനോടുള്ള ആത്മാർഥതയും സ്നേഹവുമാണ് ഇങ്ങനെയൊരു വിവാഹ ക്ഷണക്കത്ത് തയാറാക്കാൻ പ്രേരിപ്പിച്ചതെന്ന് രാജേന്ദ്രൻ പറയുന്നു. കരുനാഗപ്പള്ളി, മാവേലിക്കര, കാർത്തികപ്പള്ളി മേഖലയിലുള്ളവർക്ക് തന്റെ ഈ കൈപ്പട സുപരിചിതമാണ്. തന്നെ അറിയാവുന്നവർക്കും പരിചയമുള്ളവർക്കും സ്വന്തം കൈപ്പടയിൽ മകളുടെ വിവാഹ ക്ഷണക്കത്ത് എഴുതി നൽകാൻ കഴിഞ്ഞതിൽ സന്തോഷമുണ്ടെന്നും രാജേന്ദ്രൻ പറയുന്നു.
എല്ലാ കല്യാണക്കുറികളിലും അവസാന വരിയിൽ കാണുന്ന Best Wishes ഒഴിവാക്കി തനി ആധാരം എഴുത്തിന്റെ ശൈലിയിലാണ് ക്ഷണക്കത്തിലെ വാചകങ്ങൾ അവസാനിപ്പിച്ചിരിക്കുന്നതും. ‘സാക്ഷി: ഞങ്ങളുടെ മകൻ R. നന്ദു’.
ഇ– സ്റ്റാംപ് പേപ്പർ നിലവിൽ വന്നതോടെ വിവിധ സർക്കാർ– ഇതര ആവശ്യങ്ങൾക്ക് ഇത്തരം സ്റ്റാംപ് പേപ്പർ ഇപ്പോൾ ആരും ഉപയോഗിക്കുന്നില്ല. ഈ സാഹചര്യത്തിലാണ് ഒരു ഓർമപ്പെടുത്തൽ പോലെ പഴയ മുദ്ര പേപ്പറിൽ വിവാഹ ക്ഷണക്കത്ത് വന്നത്. അതുകൊണ്ടുതന്നെ സമൂഹമാധ്യമങ്ങളിൽ ഉൾപ്പെടെ വൈറലായിരിക്കുകയാണ് ഈ കല്യാണക്കുറിയും.
