സംസ്ഥാനത്ത് ഐപിഎസ് തലപ്പത്ത് മാറ്റം…

തിരുവനന്തപുരം: സംസ്ഥാനത്ത് ഐപിഎസ് ഉദ്യോഗസ്ഥരുടെ ചുമതലകളിൽ മാറ്റം. എറണാകുളം റൂറൽ എസ്‌പി വൈഭവ് സക്സേന എൻഐഎ എസ്‌പിയായി ദില്ലിക്ക് പോകുന്നതോടെയാണ് മാറ്റം. വൈഭവ് സക്സേനയോട് ഉടനടി പുതിയ ചുമതലയേൽക്കാനാണ് കേന്ദ്ര ആഭ്യന്തര മന്ത്രാലയം നൽകിയിരിക്കുന്ന നി‍ർദ്ദേശം.
അഞ്ച് വ‍ർഷത്തേക്ക് ഡെപ്യുട്ടേഷൻ വ്യവസ്ഥയിലാണ് വൈഭവ് സക്സേനയെ എൻഐഎയിൽ നിയമിച്ചിരിക്കുന്നത്. ഈ സാഹചര്യത്തിൽ സംസ്ഥാന ദ്രുത കർമ സേനാ വിഭാഗം കമ്മാൻഡൻ്റ് ഹേമലതയെ എറണാകുളം റൂറൽ എസ്‌പിയായി നിയമിച്ചു. തിരുവനന്തപുരം സിറ്റി ഡിസിപി വിജയഭാരത റെഡ്ഡിയെ കാസ‍‍ർകോട് എസ്‌പിയായി നിയമിച്ചു. ടി ഫറഷ് പകരം തിരുവനന്തപുരം ഡിസിപിയാകും. പൊലീസ് ടെലികോം വിഭാഗം എസ്‌പി ദീപക് ധൻക‍ർ ഫറഷ് ഒഴിയുന്ന സ്പെഷൽ ഓപറേഷൻസ് ഗ്രൂപ്പിൻ്റെ എസ്‌പിയാകും.