നിർണായക നീക്കവുമായി ഇന്ത്യ.. ചൈനീസ് അതിർത്തിക്കടുത്ത് റോഡ് നിർമാണം..

അതിർത്തിയിൽ സംഘർഷം തുടരുന്നതിനിടെ ചൈനയ്ക്ക് തിരിച്ചടിയായി ഇന്ത്യയുടെ നിർണായക നീക്കം. ഇരു രാജ്യങ്ങളും തമ്മിൽ സംഘർഷമുണ്ടായ ഡോക്​ലാമിന് സമീപം ഭൂട്ടാനിൽ ഇന്ത്യ നിർമിക്കുന്ന റോഡിന്റെ നിർമാണം പൂർത്തിയായി. ഇതോടെ ഡോക്​ലാം പ്രവിശ്യയിലേക്ക് ഇന്ത്യയ്ക്ക് കൂടുതൽ വേഗത്തിലും എളുപ്പത്തിലും എത്താനാകും. ഇതിന്റെ ഭാഗമായി ഭൂട്ടാനിൽ നിർമിച്ച റോഡിലൂടെ സാധനങ്ങൾ വേഗത്തിലെത്തിക്കുന്നതും സൈനിക നീക്കവും എളുപ്പത്തിൽ സാധ്യമാകുമെന്നാണ് പ്രതീക്ഷിക്കുന്നത്. ഡോക്​ലാമിൽ നിന്ന് ഏകദേശം 21 കിലോമീറ്റർ അകലെയുള്ള ഭൂട്ടാനിലെ ഹാ താഴ്​വരയുമായി ബന്ധിപ്പിക്കുന്നതാണ് പുതിയ റോഡ്.

ബോർഡർ റോഡ്സ് ഓർഗനൈസേഷൻ (ബിആർഒ) ഏകദേശം 254 കോടി രൂപ ചെലവിട്ടാണ് റോഡ് നിർമിച്ചിരിക്കുന്നത്. ഭൂട്ടാൻ പ്രധാനമന്ത്രി തോബ്‌ഗേ ഷെറിങ് വെള്ളിയാഴ്ച റോഡ് ഉദ്ഘാടനം ചെയ്തു. ഭൂട്ടാനിലെ തദ്ദേശീയരെ സഹായിക്കുന്നതിനും ആവശ്യമെങ്കിൽ സുരക്ഷാസേനയുടെ സഞ്ചാരം മെച്ചപ്പെടുത്തുന്നതിനും ഈ റോഡ് സഹായിക്കും. ഭൂട്ടാൻ ഇപ്പോൾ റോഡ് ഉപയോഗിക്കുമെങ്കിലും, ഭാവിയിൽ ആവശ്യമുണ്ടെങ്കിൽ ഇന്ത്യയ്ക്കും ഇത് പ്രയോജനപ്പെടും.

ടിബറ്റ് സ്വയംഭരണ മേഖലയിലെ ചുംബി താഴ്​വരയിലേക്ക് നീളുന്നതാണ് ഈ റോഡ്. ചുംബി താഴ്​വരയിൽ ചൈന സൈനികരെ വിന്യസിച്ചിട്ടുണ്ട്. ഭൂട്ടാൻ സൈന്യത്തെ വേഗത്തിൽ ചുംബി താഴ്​വരയ്ക്ക് സമീപമുള്ള അതിർത്തിയിലെത്തിക്കാൻ ഈ റോഡ് സഹായിക്കും. ഇന്ത്യ-ചൈന അതിർത്തിയോട് ചേർന്നാണ് ഭൂട്ടാൻ. ചൈനയിൽ നിന്ന് തുടർച്ചയായി അതിർത്തി പ്രകോപനങ്ങളുണ്ടാകുന്ന സാഹചര്യത്തിൽ ഭൂട്ടാനുമായുള്ള ബന്ധം ഇന്ത്യ ശക്തിപ്പെടുത്തുകയാണ്.

2017-ൽ ഡോക്ലാമിൽ ജംഫരി റിഡ്ജിനോട് ചേർന്ന് ചൈന റോഡ് നിർമിക്കാൻ ശ്രമിച്ചിരുന്നു. ഓപ്പറേഷൻ ജൂനിപർ നീക്കത്തിലൂടെ ഇന്ത്യ ഈ നിർമാണം തടഞ്ഞിരുന്നു. 72 ദിവസത്തോളം നീണ്ട സംഘർഷ സാഹചര്യത്തിനൊടുവിലാണ് മേഖലയിൽ നിന്ന് ചൈനീസ് സൈന്യം പിന്മാറിയത്. ഇതോടെ ചൈന ഡോക്​ലാമിൽ അടിസ്ഥാന സൗകര്യങ്ങളും ഹെലിപാഡുകളും നിർമിക്കുകയും പ്രദേശത്ത് സൈന്യത്തെ വിന്യസിക്കുകയും ചെയ്തിരുന്നു.