കേന്ദ്ര സർക്കാർ ജീവനക്കാർക്ക് വലിയ ആശ്വാസം… കുറഞ്ഞ ശമ്പളം 37,440 രൂപയിലേക്ക് ഉയരാൻ സാധ്യത
കേന്ദ്രസർക്കാർ ജീവനക്കാർക്ക് ആശ്വാസവാർത്ത. എട്ടാം കേന്ദ്ര ശമ്പള കമ്മീഷന്റെ ശുപാർശകൾ നടപ്പിലാക്കാനുള്ള നിബന്ധനകൾക്ക് കേന്ദ്ര മന്ത്രിസഭ അംഗീകാരം നൽകി. ഇതോടെ ഏകദേശം 50 ലക്ഷം കേന്ദ്ര സർക്കാർ ജീവനക്കാരുടെയും 69 ലക്ഷം പെൻഷൻക്കാരുടെയും ശമ്പളത്തിലും മറ്റ് ആനുകൂല്യങ്ങളിലും മാറ്റം വരാനാണ് സാധ്യത. മന്ത്രിസഭാ യോഗത്തിന് ശേഷം കേന്ദ്രമന്ത്രി അശ്വിനി വൈഷ്ണവ് ഈ തീരുമാനം മാധ്യമങ്ങൾക്ക് മുന്നിൽ അറിയിച്ചു.
വിപുലമായ ചർച്ചകൾക്ക് ശേഷം അന്തിമ രൂപം
വിവിധ മന്ത്രാലയങ്ങൾ, സംസ്ഥാന സർക്കാരുകൾ, ജോയിൻറ് കൺസൾട്ടേറ്റീവ് മെഷിനറിയിലെ സ്റ്റാഫ് പ്രതിനിധികൾ എന്നിവരുമായി നടത്തിയ വ്യാപക ചർച്ചകൾക്കു ശേഷം പുതിയ നിബന്ധനകൾ അന്തിമമാക്കിയതായും, കമ്മീഷൻ അടുത്ത 18 മാസത്തിനകം ശുപാർശകൾ സമർപ്പിക്കുമെന്നാണ് പ്രതീക്ഷയെന്നും മന്ത്രി അറിയിച്ചു. കമ്മീഷൻ ചെയർമാൻ ജസ്റ്റിസ് രഞ്ജന ദേശായി, അംഗങ്ങൾ പ്രൊഫ. പുലോക് ഘോഷ്, ഐഎഎസ് അംഗം പങ്കജ് ജെയിൻ എന്നിവരാണ്.
2026 ജനുവരി 1 മുതൽ പ്രാബല്യത്തിൽ വരും
കേന്ദ്ര സർക്കാർ ജീവനക്കാരുടെയും വിരമിച്ചവരുടെയും ശമ്പള ഘടന, അലവൻസുകൾ, പെൻഷൻ ആനുകൂല്യങ്ങൾ എന്നിവ അവലോകനം ചെയ്യാൻ ജനുവരിയിൽ എട്ടാം ശമ്പള കമ്മീഷൻ രൂപീകരിക്കപ്പെടും. മുൻകാല പ്രവണത അനുസരിച്ച്, ഓരോ പത്ത് വർഷത്തിനും ശമ്പള ഘടന അവലോകനത്തിനായി കമ്മീഷൻ രൂപീകരിക്കാറുണ്ട്. ഏഴാം ശമ്പള കമ്മീഷൻ ശുപാർശകൾ 2016 ജനുവരി 1 മുതൽ നടപ്പിലായിരുന്നു.
കേന്ദ്ര സർക്കാർ ജീവനക്കാർക്ക് പണപ്പെരുപ്പത്തിന്റെ ബാധ കുറയ്ക്കാൻ ആറ് മാസത്തിനിടെ വേതന പരിഷ്കരണങ്ങൾ നൽകുന്നത് തുടരും. പ്രധാന വകുപ്പുകളായ പ്രതിരോധ, ആഭ്യന്തര, പേഴ്സണൽ ആൻഡ് ട്രെയിനിംഗ് വകുപ്പുകൾ, സംസ്ഥാന സർക്കാർ എന്നിവയിൽ നിന്നുള്ള വിവരങ്ങൾ ശേഖരിച്ചതിന്റെ അടിസ്ഥാനത്തിലാണ് നിബന്ധനകൾ അന്തിമമാക്കിയതെന്ന് ജൂലൈയിൽ സർക്കാർ പാർലമെന്റിനെ അറിയിച്ചിരുന്നു.
ജിവനക്കാരുടെയും പെൻഷൻക്കാരുടെയും ശമ്പളത്തെയും പെൻഷനെയും നിർണ്ണയിക്കുന്ന പ്രധാന മാനദണ്ഡമാണ് ഫിറ്റ്‌മെന്റ് ഘടകം. നിലവിൽ, ഏഴാം ശമ്പള കമ്മീഷൻ പ്രകാരം ജീവനക്കാർക്ക് ഏറ്റവും കുറഞ്ഞ അടിസ്ഥാന ശമ്പളം 18,000 രൂപയും, പെൻഷൻ 9,000 രൂപയുമാണ്, കൂടാതെ 58% ഡി എ/ഡി ആർ ലഭിക്കുന്നു.
ഫിറ്റ്‌മെന്റ് ഘടകം പ്രകാരം പുതിയ ശമ്പള ഘടന
ഫിറ്റ്‌മെന്റ് ഘടകം 1.92: അടിസ്ഥാന ശമ്പളം 34,560 രൂപ, പെൻഷൻ 17,280 രൂപ.
ഫിറ്റ്‌മെന്റ് ഘടകം 2.08: അടിസ്ഥാന ശമ്പളം 37,440 രൂപ, പെൻഷൻ 18,720 രൂപ.
