ഗണേഷ് കുമാർ വിവാദം….സര്ക്കാരിനെതിരെ രാഷ്ട്രീയ ചോദ്യങ്ങള.. മുഖ്യമന്ത്രിയെ ഉന്നമിട്ട് പ്രതിപക്ഷം…
തിരുവനന്തപുരം: മന്ത്രി ഗണേഷ് കുമാറിനെതിരായ ഭാര്യയുടെ പരാതി കുടുംബപ്രശ്നമെന്ന് പറഞ്ഞ് ഒത്തുതീര്പ്പാക്കുമ്പോഴും എൽഡിഎഫ് സര്ക്കാരിനെതിരെ രാഷ്ട്രീയ ചോദ്യങ്ങള് ഉയരുന്നു. ഒരു മന്ത്രി പാലിക്കേണ്ട ധാര്മികത മുതൽ പൊലീസ് സഹായം കിട്ടിയില്ലെന്ന് തുറന്നു പറച്ചിൽ വരെ പിണറായി സര്ക്കാരിന്റെ സ്ത്രീ പക്ഷ നിലപാടുകളെ ചോദ്യം ചെയ്യുന്നതാണ്.
മന്ത്രി മാപ്പു പറഞ്ഞു, ഭാര്യ ക്ഷമിച്ചു. പരാതി ഒത്തുതീര്പ്പായി. പക്ഷേ മുഖ്യമന്ത്രിക്കും എൽഡിഎഫിനും ഇതു പറഞ്ഞ് ഗണേഷിന്റെ കാര്യത്തിൽ എല്ലാം തീര്ക്കാനാകില്ല. പിണറായി സര്ക്കാരിന് ഏറ്റവും വലിയ നേട്ടമായി പറയുന്നത് സ്ത്രീ പക്ഷ നിലപാടുകളാണ്. എന്നാൽ ഗണേഷിനെ മന്ത്രിസഭയിൽ ഇരുത്തിക്കൊണ്ട് മുഖ്യമന്ത്രിക്ക് ആ സ്ത്രീപക്ഷ അവകാശ വാദം ആവര്ത്തിക്കാനാകില്ല. വീട്ടിൽ കയ്യേറ്റമടക്കമുണ്ടായെന്ന് 112ൽ വിളിച്ച് മന്ത്രിയുടെ ഭാര്യ പരാതിപ്പെട്ടപ്പോള് വന്ന പൊലീസ് ഒരു നടപടിയും എടുത്തില്ല. ഒന്നും ചെയ്യാനില്ലെന്ന് പറഞ്ഞ് പൊലീസ് കയ്യൊഴിഞ്ഞു. മുഖ്യമന്ത്രിയുടെ മകളെ വിവരം അറിയിച്ചെന്ന വെളിപ്പെടുത്തലുമുണ്ടായി. പരാതി ഒത്തുതീര്പ്പാക്കുമ്പോഴും ഒരു ഇടപെടലുമുണ്ടായില്ലെന്ന പ്രശ്നം നിലനിൽക്കുന്നു. മുഖ്യമന്ത്രിയെ ഉന്നമിട്ടാണ് പ്രതിപക്ഷത്തിന്റെ പ്രതികരണങ്ങള്.
രാഹുൽ മാങ്കൂട്ടത്തിലിനെതിരായ ബലാത്സംഗക്കേസുകളിൽ പ്രത്യേക സംഘത്തെ നിയോഗിച്ച് നടപടികള് വേഗത്തിലാക്കിയ സര്ക്കാര് ഗണേഷിന്റെ വിഷയത്തിൽ എന്തു ചെയ്തെന്ന ചോദ്യം തെരഞ്ഞെടുപ്പ് പ്രചാരണത്തിൽ പ്രതിപക്ഷം ഉയര്ത്തും. പത്തനാപുരത്ത് ഗണേഷിന്റെ സ്ഥാനാര്ഥിത്വം വരുമ്പോഴുമൊക്കെ ഇടതു നിലപാട് ചോദ്യം ചെയ്യപ്പെടും. അതേസമയം, ഗണേഷ് മന്ത്രിയായി തുടരുന്നതിൽ മുന്നണിയിൽ സിപിഐയ്ക്ക് ഉള്പ്പെടെ എതിര്പ്പുണ്ട്.
