ടേക്ക് ഓഫിനിടെ വിമാനത്തിൻറെ സീറ്റിൽ തീ…. തീ പടർന്നത്….
യാത്രക്കാരുമായി പുറപ്പെടാനൊരുങ്ങിയ വിമാനത്തിൽ അപ്രതീക്ഷിത സംഭവം. ഉടൻ തന്നെ അടിയന്തരമായി വിമാനത്തിൽ നിന്ന് യാത്രക്കാരെ ഒഴിപ്പിച്ചു. അമേരിക്കയിലെ ഡെൻവർ അന്താരാഷ്ട്ര വിമാനത്താവളത്തിൽ നിന്ന് ടേക്ക് ഓഫ് ചെയ്യാനൊരുങ്ങിയ വിമാനത്തിൽ നിന്നാണ് യാത്രക്കാരെ ഒഴിപ്പിച്ചത്.
108 യാത്രക്കാരുമായി പുറപ്പെടാനൊരുങ്ങിയ സൗത്ത് വെസ്റ്റ് എയര്‍ലൈന്‍സിന്‍റെ ബോയിങ് 737-700 വിമാനത്തിലാണ് സംഭവം ഉണ്ടായത്. ടേക്ക് ഓഫിന് ഒരുങ്ങുന്നതിനിടെ വിമാനത്തിലെ ഒരു യാത്രക്കാരന്‍റെ സ്മാര്‍ട്ട്ഫോണ്‍ ബാറ്ററി കത്തുകയായിരുന്നു. ഇതില്‍ നിന്നുയര്‍ന്ന തീ വിമാനത്തിന്‍റെ സീറ്റിലേക്ക് പടരുകയുമായിരുന്നു. വിമാനത്തിന്‍റെ സീറ്റില്‍ തീനാളങ്ങള്‍ ആളിപ്പടര്‍ന്നതോടെ യാത്രക്കാര്‍ പരിഭ്രാന്തരായതായി പറയുന്നു.
സോഷ്യല്‍ മീഡിയയില്‍ ഇതിന്‍റെ വീഡിയോ പ്രചരിക്കുന്നുണ്ട്. ആളുകള്‍ പരിഭ്രാന്തരായി നടക്കുന്നത് വീഡിയോയില്‍ കാണാം. സംഭവം നടന്ന ഉടന്‍ തന്നെ ക്യാബിന്‍ ക്രൂ, യാത്രക്കാരെ അടിയന്തരമായി ഒഴിപ്പിക്കണമെന്ന് അലറിവിളിച്ചു. വേഗം തന്നെ പുറത്തിറങ്ങാന്‍ അവര്‍ യാത്രക്കാരോട് ആവശ്യപ്പെടുന്നത് വീഡിയോയിലുണ്ട്. പെട്ടെന്നുണ്ടായ സംഭവത്തില്‍ തങ്ങളുടെ ലഗേജും കയ്യിലെടുത്ത് യാത്രക്കാര്‍ പുറത്തേക്ക് ഇറങ്ങുകയായിരുന്നു.
