മത്സ്യതൊഴിലാളികൾക്ക് ക്രൂര മർദ്ദനം….

അമ്പലപ്പുഴ: തോട്ടപ്പള്ളിയിൽ 2 മത്സ്യതൊഴിലാളികൾക്ക് ക്രൂര മർദ്ദനമേറ്റു.ഇവരെ ആശുപത്രിയിൽ പ്രവേശിപ്പിച്ചു. തോട്ടപ്പള്ളി പൊഴിയിലായിരുന്നു സംഭവം.
മത്സ്യ ബന്ധനത്തിനു പോകുന്നതിന് മുൻപ് വള്ളത്തിൽ പെട്രോളും, ആഹാരസാധനങ്ങളും വെക്കാൻ പോയ തിരുവനന്തപുരം സ്വദേശി ഫ്രാൻസിസ് (38), കൊല്ലം വാടി സ്വദേശി ജയിംസ് (37) എന്നിവർക്കാണ് ക്രൂര മർദ്ദനമേറ്റത്.ഇവർ വള്ളത്തിനടുത്തെത്തിയപ്പോൾ വള്ളത്തിലെ ബാറ്ററിയും, എക്കോ സിസ്റ്റവും ഒരാൾ മോഷ്ടിക്കുന്നതാണ് കണ്ടത്.ഉടൻ തന്നെ ഇത് വള്ളത്തിൽ വെച്ചിട്ട് പോകാൻ മത്സ്യതൊഴിലാളികൾ ആവശ്യപ്പെടുകയും ഇയാൾ അത് വള്ളത്തിൽ വെച്ചിട്ട് പോകുകയും ചെയ്തു.20 മിനിറ്റിന് ശേഷം പോയ ആൾ 12 ഓളം പേരുമായി സംഘം ചേർന്ന് എത്തി ഫ്രാൻസിസിനേയും, ജെയിംസിനേയും ക്രൂരമായി മർദ്ദിച്ചു. ഫ്രാൻസിസിൻ്റെ ഇരുകാലുകളും, കൈയ്യും അക്രമികൾ തല്ലി ഒടിച്ചു.ഇരുവരെയും നാട്ടുകാർ ആലപ്പുഴ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.ഗുരുതരാവസ്ഥയെ തുടർന്ന് ഫ്രാൻസിസിനെ തിരുവനന്തപുരത്തെ ആശുപത്രിയിലേക്ക് പിന്നീട് മാറ്റി. അക്രമികളിൽ 3 പേരെ നാട്ടുകാർ പിടികൂടി സംഭവസ്ഥലത്തു വെച്ചു തന്നെ അമ്പലപ്പുഴ പൊലീസിന് കൈമാറി.